ព័ត៌មានជាតិ

ឯកឧត្តម គួច ចំរើនអភិបាល នៃគណៈអភិបាលខេត្តព្រះសីហនុបានអញ្ជើញបើកកញ្ចប់លទ្ធផលប្រឡងសញ្ញាបត្រមធ្យមសិក្សាទុតិយភូមិនៅសាលាខេត្តព្រះសីហនុ

(ខេត្តព្រះសីហនុ) នៅព្រឹកថ្ងៃសៅរ៍ ១៣កើត ខែបុស្ស ឆ្នាំឆ្លូវ ត្រីស័ក ព.ស ២៥៦៥ ត្រូវនឹងថ្ងៃទី១៥ ខែមករា ឆ្នាំ២០២២ មន្ទីរអប់រំ យុវជន និងកីឡាខេត្តព្រះសីហនុ បើកកញ្ចប់លទ្ធផលប្រឡងសញ្ញាបត្រមធ្យមសិក្សាទុតិយភូមិនៅសាលាខេត្តព្រះសីហនុ ក្រោមអធិបតីឯកឧត្តម គួច ចំរើន អភិបាល នៃគណៈអភិបាលខេត្តព្រះសីហនុ។

លោកស្រី អ៊ុច សោភា ប្រធានមន្ទីរអប់រំ យុវជន និងកីឡាខេត្ត បានឱ្យដឹងថា ឆ្នាំសិក្សា២០២០-២០២១ ខេត្តព្រះសីហនុ មានមណ្ឌលប្រឡងចំនួន៥មណ្ឌល ក្នុងនោះក្រុងព្រះសីហនុមាន ៣មណ្ឌល ស្រុកព្រៃនប់ ២មណ្ឌល មានបេក្ខជនប្រឡងចំនួនសរុប១,៣៥២នាក់ ស្រី ៧១០នាក់ បេក្ខជនប្រឡងជាប់សរុប ១,០២៣នាក់ ស្រី ៥៦២នាក់ ស្មើនឹង ៧៥,៦៧ភាគរយ។ សិស្សជាប់និទ្ទេស A មានចំនួន ២០នាក់ ស្រី ៩នាក់ ក្នុងនោះ វិទ្យាល័យហ៊ុនសែនក្រុង ៧នាក់ វិទ្យាល័យ ហ៊ុន សែន មិត្តភាព ៣នាក់ វិទ្យាល័យជីវិត ៣នាក់ វិទ្យាល័យ ហ៊ុន សែន ព្រៃនប់ ២នាក់ វិទ្យាល័យ ហ៊ុន សែន វាលរេញ ២នាក់ វិទ្យាល័យសុវណ្ណភូមិ ២នាក់ និងវិទ្យាល័យស្ទឹងហាវ ១នាក់។ និទ្ទេស B មានចំនួន ៦៧នាក់ ស្រី ៤៣នាក់។ C ១៧០នាក់ ស្រី ៩៩នាក់។ D ៣៧២នាក់ ស្រី ២០៩នាក់ និង E ៣៩៤នាក់ ស្រី ២០២នាក់។
ឯកឧត្តម គួច ចំរើន អភិបាលខេត្តព្រះសីហនុ បានថ្លែងការកោតសរសើរ និងវាយតម្លៃខ្ពស់ ចំពោះវិស័យអប់រំនៅខេត្តព្រះសីហនុ មិនអាចកាត់ផ្តាច់ចេញពីលោកគ្រូ អ្នកគ្រូបានឡើយ ដែលបានខិតខំក្នុងការជួយបណ្តុះបណ្តាលធនធានក្មួយៗនៅគ្រប់គ្រឹះស្ថានសិក្សាក្នុងខេត្តព្រះសីហនុ ធ្វើឱ្យការប្រឡងសញ្ញាបត្រមធ្យមសិក្សាទុតិយភូមិ និងការប្រឡងសញ្ញាបត្របឋមភូមិនៅគ្រប់កម្រិតសិក្សាទទួលបានលទ្ធផលល្អ ទោះបីខេត្តព្រះសីហនុ ប្រឈមនឹងវិបត្តិជំងឺកូវីដ-១៩ ក៏លោកគ្រូ អ្នកគ្រូរបស់យើងបានយកចិត្តទុកដាក់ក្នុងការបង្ហាត់បង្រៀនតាមប្រព័ន្ធឌីជីថល និងការបង្រៀនតាមបណ្តុំសហគមនៅទូទាំងខេត្តព្រះសីហនុ។
ក្នុងឱកាសនោះឯកឧត្តមអភិបាលខេត្ត ក៏បានធ្វើការណែនាំឱ្យមន្ទីរអប់រំ យុវជន និងកីឡាខេត្ត ត្រៀមរៀបចំពិធីសំណេះសំណាលជាមួយលោកគ្រូ អ្នកគ្រូដែលបានយកចិត្តទុកដាក់ខិតខំបង្ហាត់បង្រៀនសិស្សតាមសាលានីមួយៗទទួលបាននិទ្ទេស A ច្រើនជាងគេ តាមការសន្យាកន្លងមក។
សូមបញ្ជាក់ថា តាមសេចក្តីប្រកាសព័ត៌មានរបស់ក្រសួងអប់រំ យុវជន និងកីឡា បានឱ្យដឹងថា ឆ្នាំសិក្សា២០២០-២០២១ បេក្ខជនដែលប្រឡងសញ្ញាបត្រមធ្យមសិក្សាទុតិយភូមិ ដែលបានជាប់និទ្ទេស A មានចំនួនសរុប១,៧៥៣នាក់៕ 

Related Articles

Leave a Reply

Your email address will not be published.

Back to top button