រដ្ឋមន្ត្រីក្រសួងធម្មការនិងសាសនា ផ្តល់ទេយ្យទានដល់ព្រះសង្ឃ ទាំង៩វត្ត នៅក្នុងស្រុកមង្គលបូរី ដែលរងនូវការលិចលង់ដោយទឹកជំនន់
ខេត្តបន្ទាយមានជ័យ៖ដោយពិនិត្យមើលឃើញពីការលំបាកចំពោះព្រះសង្ឃ ដែលគង់ក្នុងវត្តនានាដែលរងនូវការប៉ះពាល់ដោយទឹកជំនន់ នារសៀល ថ្ងៃទី១៦ ខែតុលា ឆ្នាំ២០២៣ ក្រសួងធម្មការនិងសាសនា ដឹកនាំដោយឯកឧត្តម ហង្ស ចាន់ព្រីដា រដ្ឋលេខាធិការ ក្រសួងធម្មការនិងសាសនានិងឯកឧត្តម អ៊ុំ រាត្រី អភិបាលខេត្តបន្ទាយមានជ័យ បាននាំយកនូវទេយ្យទានរួមមាន អង្ករនិងមី រួមជាមួយថវិកាដែលជាអំណោយដ៏ថ្លៃថ្លារបស់សម្ដេចមហា បវរធិបតី ហ៊ុន ម៉ាណែត នាយរដ្ឋមន្រ្តី នៃព្រះរាជាណាចក្រកម្ពុជា និងលោកជំទាវបណ្ឌិត ពេជ្រ ចន្ទមុន្នី ហ៊ុនម៉ាណែត យកមកប្រគេនដល់ព្រះអង្គចំនួន ៩ វត្ត ដែលរងនូវការប៉ះពាល់ដោយទឹកជំនន់ នៅក្នុងស្ទឹងមង្គលបូរី។
នាឱកាសនោះឯកឧត្តម អ៊ុំ រាត្រី បានមានប្រសាសន៍ ថ្លែងអំណរគុណយ៉ាងជ្រាលជ្រៅ ចំពោះសម្តេច មហាបវរធិបតី ហ៊ុន ម៉ាណែត និងលោកជំទាវ ដែលមានសទ្ធាជ្រះថ្លា ក្នុងការចែករំលែកទាន ចំពោះព្រះសង្ឃតែងរងនូវការប៉ះពាល់ដោយទឹកជំនន់ នៅក្នុងស្រុកមង្គលបុរីនេះ ទៅវត្តទាំង ៩រួមមាន វត្ត សាយសាមន្តារាម ក្នុងឃុំចំណោមមានព្រះសង្ឃចំនួន ៥ព្រះអង្គ ទទួលបាននូវអង្ករ១៥បេ មី ១៨កេស, វត្តបុទមបារមីយារាម គោកសំរោងមាន ព្រះសង្ឃ ចំនួន១៥អង្គ ទទួលបានអង្ករ ២០បេ មី២៧ កេស ,វត្ត វេឡុសុណ្ណារាម ហ៊ុបឫស្សី ឃុំសឿរ មានប្រសាសន៍ចំនួន ៤អង្គ ទទួលបានអង្ករ ១៣បេ មី១៨កេស, វត្តសទ្ធារុក្ខារាម បល្ល័ងជ្រៃ មានព្រះសង្ឃចំនួន ៤អង្គទទួលបានអង្ករ ១៣បេ មី ១៨កេស ,វត្ត កេតុរង្សីរតនារាមចក ឃុំរហាត់ទឹក ព្រះសង្ឃចំនួន ៦អង្គ ទទួលបាននូវអង្ករ ១៣បេ មី ១៧កេស ,វត្តត្រ័យបុទុមារាមសំបួរមាស ឃុំសំបូរប្រាសាទ មានចំនួន ៨អង្គទទួលបានអង្ករ ១៤បេ មី១៤ កេស ,វត្តមហាកោសលារាម តាសល់ចាស់ ចំនួន៧រអង្គទទួលបានអង្ករ ១៤ បេ មី១៧ កេស ,វត្ត បុណ្ណរិកសរារាមស្រះឈូក ឃុំសំបួរមាន ព្រះសង្ឃ១៥អង្គទទួល អង្ករ ២០បេ មី២៦កេស និងវត្តចេតនារាមបឹងឃ្លាំង ឃុំតាឡំ មានព្រះសង្ឃចំនួន១០អង្គ ទទួលបានអង្ករ ១៨បេ មី១៨កេស។គួរបញ្ជាក់ផងដែរថា ក្នុងមួយ វត្តទទួលបានថវិកាបន្ថែមចំនួន ២០ម៉ឺនរៀលបន្ថែមទៀត។
ឯកឧត្តម ហង្ស ចាន់ព្រីដា រដ្ឋលេខាធិការក្រសួងធម្មការនិងសាសនាតំណាងឲ្យ ឯកឧត្ដមបណ្ឌិត ចាយ បូរិន រដ្ឋមន្ត្រីក្រសួងធម្មការនិងសាសនាបានមានប្រសាសន៍ថា ក្រោមការដឹកនាំរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា គឺមិនឲ្យប្រជាពលរដ្ឋណាម្នាក់ឬក៏ព្រះសង្ឃអង្គណាស្លាប់/សុគត ដោយអត់អាហារនោះឡើយ។ហេីយសូមលេីកទឹកចិត្តដល់ព្រះសង្ឃដែលកំពុង រងនូវការប៉ះពាល់ដោយទឹកជំនន់ និងសូមចូលរួមចែករំលែកនៃទុកលំបាក ថ្វីដ្បិតយើងសង្កេតឃើញថា វត្តនីមួយៗនៅទីជនបទឆ្ងាយពីពុទ្ធបរិស័ទ ដែលប្រការនេះហើយធ្វើឲ្យព្រះសង្ឃមានការខ្វះខាតចង្ហាន់និងបច្ច័យសម្រាប់កសាងសមិទ្ធផលផងដែរ៕
