ក្រុមប្រឹក្សាខេត្តបន្ទាយមានជ័យ បើកកិច្ចប្រជុំសាមញ្ញលើកទី៤៨ អាណត្តិទី៣ នៅសាលាខេត្តបន្ទាយមានជ័យ
ខេត្តបន្ទាយមានជ័យ៖ក្រុមប្រឹក្សាខេត្តបន្ទាយមានជ័យនៅព្រឹកថ្ងៃទី៧ ខែមិថុនា ឆ្នាំ២០២៣ បានបើកកិច្ចប្រជុំសាមញ្ញលើកទី៤៨ អាណត្តិទី៣ ដែលមានសេចក្ដីព្រៀងរបៀបវារៈចំនួន៦ ដែលត្រូវបានលើកយកមកពិនិត្យពិភាក្សានិងអនុម័ត នៅសាលាខេត្តបន្ទាយមានជ័យ។
ឯកឧត្តម អ៊ុំ រាត្រី អភិបាលនៃគណៈអភិបាល បានមានប្រសាសន៍ថា ពាក់ព័ន្ធនឹងការងារសន្តិសុខសណ្ដាប់ធ្នាប់សាធារណៈ ឃើញថា កងកម្លាំងប្រដាប់អាវុធទាំងបីប្រភេទ ប័ណ្ណចូលរួមសហការគ្នាយ៉ាងយកចិត្តទុកដាក់និង ការពារសន្តិសុខសណ្ដាប់ធ្នាប់ជូនបងប្អូនប្រជាពលរដ្ឋបានល្អ ពិសេសបានចូលរួមព្រឹត្តិការណ៍ធំៗនាពេលកន្លងមក មានបុណ្យចូលឆ្នាំប្រពៃណីខ្មែរនិងពិធីបុណ្យ ព្រះអគ្គីកីឡា ដែលប្រព្រឹត្តទៅដោយភាពរលូន។ចំពោះការងារគ្រោះមហន្តរាយ ខេត្តយើងជួបគ្រោះអន្តរាយ បង្កឲ្យមានការខូចខាតផ្ទះសម្បែង។កម្លាំងរបស់យើងក៏បានចុះធ្វើការជួសជុលផ្ទះសម្បែងពួកគាត់បានទាន់ពេលវេលា និង រដ្ឋបាលខេត្តក៏ដូចជាកាកបាទក្រហម បាននាំយកនូវអំណោយចែកជូនដល់បងប្អូនប្រជាពលរដ្ឋរងគ្រោះទីទ័លក្រជួបបញ្ហាផ្នែកសុខភាពគ្មានទីពឹង។
ឯកឧត្តម អ៊ុំ រាត្រី បានបន្តថា បញ្ហាការងារដោះស្រាយដីតំបន់២ តំបន់៣ ស្ថិតនៅក្នុងស្រុកព្រះនេត្រព្រះនិងស្រុកមង្គលបូរីរដ្ឋបាលខេត្ត និងមន្ទីររៀបចំដែនដីនគររូបនីយកម្មនិងសំណង់ បាននិងកំពុងដោះស្រាយ ជូនបងប្អូនប្រជាពលរដ្ឋ ដែលមានការយកចិត្តទុកដាក់ដោយបានទទួលជំទាស់ នឹងធ្វើប័ណ្ណកម្មសិទ្ធិជូនដល់បងប្អូនប្រជាពលរដ្ឋសរុបចំនួន ១០ ភូមិក្នុងនោះស្រុកព្រះនេត្រព្រះចំនួន ៧ភូមិ នៅស្រុកមង្គលបូរីចំនួន ៣ភូមិ។
នៅក្នុងការប្រជុំសាមញ្ញលើកទី៤៨ ឯកឧត្ដម ខេង ស៊ុំ ប្រធានក្រុមប្រឹក្សាខេត្ត បានមានប្រសាសន៍កោតសរសើរ ដោយស្មោះចំពោះរដ្ឋបាល កងកម្លាំងប្រដាប់អាវុធទាំងអស់ដែលបានខិតខំប្រឹងប្រែងយកអស់កម្លាំងកាយចិត្ត ទទួលខុសត្រូវចំពោះការងារភារកិច្ចរៀងខ្លួនទទួលបានភាពជោគជ័យ និងសូមឯកឧត្តម លោកជំទាវអស់លោក លោកស្រីបន្តបំពេញការងាររបស់ខ្លួន សាមគ្គីរួបរួមទៅដល់ប្រជាពលរដ្ឋយើងឲ្យបានល្អប្រសើរដោយមិនប្រកាន់បក្ខពួក ឬនិន្នាការនយោបាយអ្វីឡើយ៕
