លោកឧត្តមសេនីយ៍ត្រី សឹង្ហ ទុំ នាំយកអំណោយស័ង្កសី ឯកឧត្តម ហ៊ុន ម៉ាណែត និងលោកជំទាវ ផ្តល់ជូនប្រជាពលរដ្ឋរងគ្រោះដោយខ្យល់កន្រ្តាក់
(បន្ទាយមានជ័យ)៖នាថ្ងៃទី៨ ខែមីនា ឆ្នាំ២០២២ លោកឧត្តមសេនីយ៍ត្រី សឹង្ហ ទុំ មេបញ្ជការ កងពលតូចថ្មើរជើងលេខ៥១ អញ្ជើញចុះត្រួតពិនិត្យ ស្ថានភាពប្រជាពលរដ្ឋរងគ្រោះដោយខ្យល់កន្រ្តាក់ ស្ថិតនៅភូមិ ឃុំសំរោង ស្រុកអូរជ្រៅ ខេត្តបន្ទាយមានជ័យ។
សូមបញ្ជាក់ថា នាល្ងាចថ្ងៃទី៧ ខែមីនា ឆ្នាំ២០២២ វេលាម៉ោង១៧:៣០នាទី មានភ្លៀងលាយឡំ និងខ្យល់កន្រ្តាក់ ធ្វើឲ្យប៉ះពាល់ខូចខាតផ្ទះប្រជាពលរដ្ឋស្ថិតនៅក្នុងស្រុកចំនួន ៣ ក្នុងខេត្តបន្ទាយមានជ័យ គឺស្រុកអូរជ្រៅ ស្រុកថ្មពួក និងស្រុកភ្នំស្រុក បណ្តាលឲ្យខូចខាតផ្ទះប្រជាពលរដ្ឋសរុបចំនួន ៣៧ខ្នង សាលារៀនចំនួន ២ខ្នង កងកម្លាំងចម្រុះ រួមមាន កងកម្លាំងអន្តរាគមន៍កងពលតូចថ្មើរជើងលេខ៥១ កងរាជអាវុធហត្ថ នគរបាល ប្រជាការពារ និងអាជ្ញាធរមូលដ្ឋាន រួមគ្នាចុះជួយរុះរើ និងជួសជុលឡើងវិញជូនប្រជាពលរដ្ឋ។
លោកមេបញ្ជាការបានបញ្ជាក់ថា កងកម្លាំងកងពលតូចថ្មើរជើងលេខ៥១ ក្រៅពីភារកិច្ចស្នូលរបស់កងទ័ព កម្លាំងយើងបានត្រៀមជានិច្ចទាំងកម្លាំងអន្តរាគមន៍ មធ្យោបាយ ឧបករណ៍ សម្ភារ សម្រាប់ជួយសង្រ្គោះប្រជាពលរដ្ឋរងគ្រោះមហន្តរាយដោយធម្មជាតិផ្សេងៗ ២៤ម៉ោងលើ២៤ម៉ោង ដោយហេតុថា ខេត្តបន្ទាយមានជ័យ គឺជាខេត្តមួយដែលតែងតែរងគ្រោះ ដោយខ្យល់កន្រ្តាក់ និងទឹកជំនន់ជារៀងរាល់ឆ្នាំ ដោយមានការយកចិត្តទុកដាក់ពីសំណាក់់ ឯកឧត្តម ហ៊ុន ម៉ាណែត និងលោកជំទាវ បានផ្តល់ស័ង្កសីចំនួន ១០០០០សន្លឹក(មួយម៉ឺនស្លឹក)រក្សាទុកនៅអង្គភាពកងពល សម្រាប់ជួយជួសជុលផ្ទះប្រជាពលរដ្ឋរងគ្រោះដោយខ្យល់កន្រ្តាក់លកផងដែរ។
ប្រជាពលរដ្ឋ និងអាជ្ញាធរមូលដ្ឋាន បានគោរពថ្លែងអំណរគុណ ជូនចំពោះ ឯកឧត្តម ហ៊ុន ម៉ាណែត និងលោកជំទាវ ដែលតែងតែយកចិត្តទុកដាក់ដល់សុខទុក្ខប្រជាពលរដ្ឋទូទៅជួបការលំបាក និងជួបគ្រោះមហន្តរាយផ្សេងៗ និងសូមមានសុខភាពល្អបរិបូរណ៍ ទទួលជោគជ័យគ្រប់ភារកិច្ចជូនជាតិមាតុភូមិ និងប្រជាជនជានិច្ចនិរន្តរ៍ និងគាំទ្រឯកឧត្តម ហ៊ុន ម៉ាណែត ជាបេក្ខភាពនាយករដ្ឋមន្រ្តីនាពេលអនាគត៕
