ជនសង្ស័យម្នាក់ ពាក់ព័ន្ធករណីលួចខ្សែភ្លើង និងប្រើប្រាស់ដោយខុសច្បាប់នូវសារធាតុញៀន ត្រូវអាវុធហត្ថចាប់ឃាត់ខ្លួនបញ្ជូនទៅតុលាការ
(បន្ទាយមានជ័យ )៖ កម្លាំងមូលដ្ឋានកងរាជអាវុធហត្ថក្រុងសិរីសោភ័ណ បានទទួលពាក្យបណ្ដឹងរបស់ជនរងគ្រោះឈ្មោះ ច្រិញ តឿ ភេទប្រុស អាយុ៣៧ឆ្នាំ រស់នៅភូមិគោរដ្ឋាន សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ ជាមេការមើលការខុសត្រូវ នៅបុរីអេសឡឺបាឡង់ឡែន ដែលមានទីតាំងស្ថិតក្នុងភូមិកំពង់ស្វាយ សង្កាត់កំពង់ស្វាយ ក្រុងសិរីសោភ័ណ បានប្តឹងចោទប្រកាន់ទៅលើឈ្មោះ អឿន ណាត ភេទប្រុស អាយុ២៧ឆ្នាំ និងឈ្មោះ ឡុង ភេទប្រុស អាយុ១៧ឆ្នាំ ស្នាក់នៅបណ្តោះអាសន្នភូមិចក សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ ពាក់ព័ន្ធពីករណី លួច(ខ្សែភ្លើង) ដែលប្រព្រឹត្តកាលពីវេលាម៉ោង២០ និង២០នាទី ថ្ងៃទី០៨ ខែសីហា ឆ្នាំ២០២៤ ។
ក្រោយពីបានទទួលបណ្ដឹងរបស់ជនរងគ្រោះខាងលើ លោកវរសេនីយ៍ត្រី សុខ ឡេង មេបញ្ជាការមូលដ្ឋានកងរាជអាវុធហត្ថក្រុងសិរីសោភ័ណ បានដឹកនាំកម្លាំងចុះទៅដល់កន្លែងកើតហេតុ ធ្វើការស្រាវជ្រាវកំណត់បានមុខសញ្ញាជនសង្ស័យ រហូតឈានដល់ការឃាត់ខ្លួនឈ្មោះ អឿន ណាត ភេទប្រុស អាយុ២៧ឆ្នាំ ហើយដកហូតវត្ថុតាងខ្សែភ្លើងចំនួន១ដុំ ប្រវែង២២,៥ម៉ែត្រ ចំណែកឈ្មោះ ឡុង បានគេចខ្លួន ហើយនាំមកមូលដ្ឋានកងរាជអាវុធហត្ថក្រុងដើម្បីធ្វើការសួរនាំ និងបានធ្វើតេស្តទឹកនោមរកសារធាតុញៀន ជាលទ្ធផលវិជ្ជមាន (+)។
លោកវរសេនីយ៍ត្រី សុខ ឡេង បានឱ្យដឹងថា ក្រោយឃាត់ខ្លួន និងសួរនាំរួច ជនសង្ស័យបានឆ្លើយសារភាពថា ខ្លួននឹងបក្ខពួក ពិតជាបានធ្វេីសកម្មភាពចូលលួចកាត់ខ្សែភ្លើង និងទុយោស្ព័នម៉ាស៊ីនត្រជាក់ នៅក្នុងបុរីខាងលើពិតប្រាកដមែន ដោយបានលួចចំនួន០៥លើកមកហើយ ដេីម្បីលក់យកលុយចែកគ្នា ទិញគ្រឿងញៀនមកប្រេីប្រាស់។ ដោយផ្អែកលេីចម្លេីយសារភាព និងមានវត្ថុតាងជាក់ស្តែង កម្លាំងមូលដ្ឋានកងរាជអាវុធហត្ថក្រុងកសាងសំណុំរឿងបញ្ជូនទៅបញ្ជាការដ្ឋានកងរាជអាវុធហត្ថខេត្តចាត់ការបន្តតាមនីតិវិធី។
លោកវរសេនីយ៍ឯក ម៉ែន ភិរម្យ មេបញ្ជាការរងកងរាជអាវុធហត្ថខេត្ត ទទួលការងារស្រាវជ្រាវ និងបង្ក្រាបបទល្មេីសបានឱ្យដឹងថា បច្ចុប្បន្ន ជនសង្ស័យត្រូវបានបញ្ជូនទៅសាលាដំបូងខេត្តហើយ នៅរសៀលថ្ងៃសៅរ៍ ទី១០ ខែសីហា ឆ្នាំ២០២៤នេះ ដើម្បីអនុវត្តតាមនីតិវិធី៕
