ព័ត៌មានជាតិ

ឯកឧត្តម អ៊ុន ចាន់ដា អភិបាលខេត្តកំពង់ចាម នាំយកអំណោយសម្តេចកិត្តិព្រឹទ្ធបណ្ឌិត ផ្តល់ជូនពលរដ្ឋរងគ្រោះ ដោយអគ្គីភ័យ ១៣គ្រួសារ នៅស្រុកចំការលើ

ខេត្តកំពង់ចាម៖ ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម និងជាប្រធានគណៈកម្មាធិការសាខាកាកបាទក្រហមខេត្តកំពង់ចាម អមដំណើរ ដោយមន្ត្រីពាក់ព័ន្ធ នាព្រឹកថ្ងៃទី៤ ខែកុម្ភៈ ឆ្នាំ២០២២នេះ បានអញ្ជើញនាំយក អំណោយរបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ផ្តល់ជូន បងប្អូន ប្រជាពលរដ្ឋ ដែលរងគ្រោះដោយ អគ្គីភ័យ ១៣គ្រួសារ នៅភូមិស្ពឺកើត ឃុំស្ពឺ ស្រុកចំការលើ។
បន្ទាប់ពីបាន ពាំនាំនូវប្រសាសន៍ផ្តាំ ផ្ញើសួរសុខទុក្ខ ពីសំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ឯកឧត្តម អ៊ុន ចាន់ដា អភិបាលខេត្ត បានអំពាវនាវដល់ ប្រជាពលរដ្ឋទាំងអស់ សូមឲ្យមានការប្រុងប្រយ័ត្នខ្ពស់ ពីគ្រោះអគ្គីភ័យ ដែលអាចកើតមានគ្រប់ពេល ប្រសិនបើ មានការធ្វេសប្រហែស។ ដូចនេះពេលយើងចាកចេញពីផ្ទះត្រូវបិទកុងតាក់ភ្លើងអគ្គិសនី ពន្លត់ភ្លើងចង្ក្រានហ្គាស ពន្លត់ទៀន ធូបជាមុនសិន ដើម្បីបង្ការក្រែងកើតមានមហន្តរាយផ្សេងៗ។ ម៉្យាងទៀតការសង់តូបលក់ដូរឡើងវិញត្រូវតភ្ជាប់ចរន្តអគ្គិសនី ដោយរៀបចំឲ្យបានត្រឹមត្រូវទៅតាមបទដ្ឋានបច្ចេកទេស ដេីម្បីធានាសុវត្ថិភាព។
ជាមួយគ្នានោះ ឯកឧត្តមប្រធាន ក៏បានក្រើនរំលឹកបងប្អូនប្រជាពលរដ្ឋទាំងអស់ សូមលើកកំពស់ការថែទាំសុខភាពឲ្យបានល្អ រស់នៅត្រូវប្រកាន់ខ្ជាប់អនាម័យស្អាត ជាពិសេសត្រូវយកចិត្តទុកដាក់ អំពីសុវត្ថិភាពផ្ទាល់ខ្លួនជាប្រចាំ ដោយត្រូវអនុវត្តឲ្យបានខ្ជាប់ខ្ជួន ទៅតាមវិធានការសុខាភិបាល “៣ការពារ ៣កុំ” ដើម្បីជៀសផុតពីការឆ្លងរាលដាល នៃជំងឺកូវីដ១៩ បម្លែងថ្មី អូមីក្រុង។
គួរបញ្ជាក់ថា អំណោយរបស់សម្តេច កិត្តិព្រឹទ្ធបណ្ឌិត ដែលបានផ្តល់ជូនទាំង ១២គ្រួសារ ដោយមាន អង្ករ មី ត្រីខ ទឹកត្រី ទឹកស៊ីអ៊ីវ ឃីត១កញ្ចប់ (មុង ភួយ សារុង ក្រម៉ា) តង់ និងអាវយឺត។ ដោយឡែក ចំពោះថវិកាផ្តល់ជូនម្ចាស់ផ្ទះដែលខូចខាតទាំងស្រុង និងជាម្ចាស់តូបរងគ្រោះ ១គ្រួសារ ទឹកប្រាក់ចំនួន ២លានរៀល។ ផ្តល់ជូនម្ចាស់តូបរងគ្រោះ ១០គ្រួសារ ក្នុង១គ្រួសារ ៥០ ម៉ឺនរៀល និង២គ្រួសារទៀត ដែលខូចខាត ៤០% ផ្តល់ជូន ១គ្រួសារ ៤០ម៉ឺនរៀលផងដែរ។
គួររំលឹកថា ហេតុការណ៍ គ្រោះអគ្គីភ័យ ខាងលេី បានកើតឡើងកាលពី វេលាម៉ោង ៩ និង២០នាទីយប់ ថ្ងៃទី៣ ខែកុម្ភ: ឆ្នាំ២០២២ ដោយ ឆ្លងចរន្តអគ្គិសនី ផ្តើមចេញពីបង្គោលភ្លើងតាមថ្នល់ បណ្តាលឲ្យឆេះរាលដាលដល់តូបលក់ដូរទូរស័ព្ទ គ្រឿងអគ្គិសនី តូបអ៊ុតសក់ជាបន្តបន្ទាប់ ហើយបន្តរាលឆេះផ្ទះក្បឿង ទំហំ ១០ម×១៩ម នៅជាប់នឹងផ្សារស្ពឺ ផងដែរ៕

Related Articles

Leave a Reply

Your email address will not be published.

Back to top button