ប្រជាពលរដ្ឋទីទាល់ក្រ នៅក្រុងសិរីសោភ័ណ ចំនួន៥គ្រួសារ ទទួលបានអំណោយពីសមាគមនារីកម្ពុជា ដើម្បីសន្តិភាព និងការអភិវឌ្ឍន៍ខេត្តបន្ទាយមានជ័យ
ខេត្តបន្ទាយមានជ័យ៖ដោយពិនិត្យឃើញភាពជាក់ស្ដែង ចំពោះបងប្អូនប្រជាពលរដ្ឋជួបការលំបាកទីទាល់ក្រ ស្ត្រីមេម៉ាយកូនច្រើន ចាស់ជរាគ្មានទីពឹង នារសៀលថ្ងៃទី១៥ ខែឧសភា ឆ្នាំ២០២៣ សាខាសមាគមនារីកម្ពុជា ដើម្បីសន្តិភាពនិងអភិវឌ្ឍន៍ខេត្តបន្ទាយមានជ័យ ដឹកនាំដោយលោកជំទាវ ជ័យ ណារី អ៊ុំ រាត្រី អនុប្រធានកិត្តិយសសមាគមនារីកម្ពុជាដើម្បីសន្តិភាព អភិវឌ្ឍន៍ខេត្ត អមដំណើរដោយលោកជំទាវ រស់ សុផានី អភិបាលរងខេត្ត និងជាប្រធានសាខាសមាគមនារីកម្ពុជាខេត្ត រួមដំណើរដោយលោក លោកស្រី ក្រុមការងារបាននាំយកអំណោយមនុស្សធម៌ មកផ្ដល់ជូនបងប្អូន ប្រជាពលរដ្ឋដល់គេហដ្ឋានផ្ទាល់ ដោយពួកគាត់កំពុងជួបការលំបាកចំនួន ៥គ្រួសារ ស្ថិតនៅក្នុងសង្កាត់អូអំបិល ១ គ្រួសារ សង្កាត់ទឹកថ្លា ២គ្រួសារ និងសង្កាត់កំពង់ស្វាយ ២គ្រួសារក្នុងក្រុងសិរីសោភ័ណ ដោយក្នុងមួយគ្រួសារៗទទួលបាន អង្ករ ២០គីឡូក្រាម ,មី១កេស ,ទឹកសុទ្ធវីតាល់១កេស ,ត្រីខ១យួរ ,ទឹកស៊ីអ៊ីវ១យួរ ,ទឹកត្រី១យួរ ,ស្ករស ,ប៊ីចេង ,អំបិល និងថវិកាចំនួន ២០ម៉ឺនរៀល។
នាឱកាសនោះលោកស្រី រស់ សុផានី ប្រធានសាខាសមាគមនារីកម្ពុជាខេត្ត និងលោកជំទាវ ជ័យ ណារី អ៊ុំ រាត្រី អនុប្រធានកិត្តិយសសមាគមនារីកម្ពុជាខេត្ត បានមានប្រសាសន៍ថា សមាគមនារីខេត្តបន្ទាយមានជ័យ តែងតែបានចុះជួយជ្រោមជ្រែង រាល់ទុក្ខលំបាកចំពោះបងប្អូនជានិច្ច ឱ្យតែអាជ្ញាធរមូលដ្ឋានធ្វើការរាយការណ៍មកដល់សមាគមយើង ទោះអំណោយមនុស្សធម៌និងថវិកាទាំងអស់ មិនបានជួយដោះស្រាយបានយូរក្ដី តែអាចជួយចូលរួមចំណែក រំលែកនូវទុក្ខលំបាកបានមួយគ្រាផងដែរ។
លោកជំទាវបានបន្តថា ផលផ្លែផ្កានៃការប្រមូលផ្ដុំ កម្លាំងមនុស្សធម៌គឺស្ថិតក្នុងសុខសន្តិភាព ស្ថេរភាព ដែលជាមូលដ្ឋានគ្រឹះនៃការអភិវឌ្ឍន៍ ក្រោមមគ្គិទេសឧត្តុងឧត្តមរបស់ប្រមុខរាជរដ្ឋាភិបាល ទង្វើទាំងនេះជាសក្ដីភាព ជាក់ស្ដែងបង្ហាញភាពម្ចាស់ការ ភាពរឹងមាំនៃបណ្ដាញសមាគមនារីកម្ពុជា ក្នុងការបំពេញភារកិច្ចផ្ដល់សេវាមនុស្សធម៌ ជួយប្រជាពលរដ្ឋរងគ្រោះ ងាយរងគ្រោះ ចាស់ជរាគ្មានទីពឹង ប្រកបដោយការទទួលខុសត្រូវដូចមានទិសស្លោក បញ្ជាក់ថា“ខ្មែរជួយខ្មែរ មិនទុកនរណាម្នាក់ស្លាប់ដោយអត់អាហារនោះឡើយ“៕
