ខេត្តបន្ទាយមានជ័យ៖ក្នុងពិធីប្រកាសតែងតាំងគណៈសង្ឃ វត្តទក្ខិណៈគង្គារាម អញ្ចាញ ស្ថិតនៅក្នុងឃុំឬស្សីក្រោក ស្រុកមង្គលបូរី ខេត្តបន្ទាយមានជ័យ នាព្រឹកថ្ងៃទី២៧ ខែកក្កដា ឆ្នាំ២០២៣ ព្រះឧត្តមសីលញ្ញាណ ធុល សុធា ព្រះមេគណខេត្តបន្ទាយមានជ័យ បានមានសង្ឃដីកាថា សាសនាព្រះពុទ្ធ នៃយើងគឺជាបណ្ដុំកម្រងឬក៏ចង្កោម នៃពាក្យដំបូន្មានឱវាទការអប់រំប្រៀនប្រដៅ ព្រោះហេតុនេះហើយទើបសាសនា ត្រូវបានគេចាត់ទុកជាកត្តាទី១ នៃកត្តាទាំង៣ គឺកត្តាសាសនា កត្តាអ្នកដឹកនាំ និងការស់នៅក្នុងសង្គមមាគ៌ានៃមនុស្ស។
ព្រះឧត្តមសីលញ្ញាណ ធុល សុធា ព្រះមេគណខេត្តបានមានសង្ឃដីកាបន្តថា យោងតាមការចាំបាច់ពុំអាចខ្វះបានទៅលើផ្នែកតួនាទី ជាការដឹកនាំក្នុងវត្តនីមួយៗ ដែលត្រូវបានព្រះមេគណ និងលោកប្រធានមន្ទីរធម្មការនិងសាសនាខេត្ត បានផ្ដល់នូវទំនុកចិត្តយ៉ាងមុតមាំចំពោះព្រះចៅអធិការ គ្រូសូតឆ្វេង គ្រូសូត្រស្ដាំ ដោយពិនិត្យឃើញថា ជាបុគ្គលមានវិជ្ជាជីវៈ សមល្មមជាបុគ្គលមានការតាំងចិត្តជាកណ្ដាល ឧបេក្ខា ស្គាល់បញ្ហាសង្គមជា បុគ្គលវ័យឆ្លាត ក្នុងការរកដំណោះស្រាយហើយជាបុគ្គលមានការសណ្តោស ជ្រះថ្លាទទួលខុសត្រូវខ្ពស់។
លោក លី សារី អភិបាលរងខេត្ត បានមានប្រសាសន៍ថា តាំងតែពីដើមរហូតមកដល់បច្ចុប្បន្ន វត្តអារាមបានចូលរួមអភិវឌ្ឍន៍សង្គមកម្ពុជាស្ទើរគ្រប់វិស័យ ពិសេសអប់រំ សុខាភិបាល សេដ្ឋកិច្ច សង្គមកិច្ច ជាដើម ថ្នាក់ដឹកនាំជាច្រើនរូបសុទ្ធសឹងតែជាអតីតភាពជាក្មេងវត្តឬក៏បានទទួលការអប់រំបណ្ដុះបណ្ដាលពីវត្តដែលមានព្រះសង្ឃជាគ្រូបង្ហាត់បង្រៀនឬក៏ជាគ្រូបាធ្យាយ។
ជាមួយគ្នានោះដែរលោកអភិបាលរងខេត្ត បានផ្ដាំផ្ញើដល់គណៈសង្ឃវត្ត ត្រូវរួមសាមគ្គីជាមួយអាចារ្យ គណៈកម្មការ ដើម្បីបញ្ជៀស នូវអធិករកើតឡើងធ្វើយ៉ាងណាឲ្យទីអារាម ទទួលបាននូវសុខសន្តិភាព ចេះគិតអំពីជីវិតរបស់ខ្លួន ត្រូវយល់ច្បាស់អំពីអំពើល្អ អាក្រក់វាចាកអំពើឧបាយមុខផ្សេងៗ ជាមនុស្សផ្ដល់នូវចំណេះដឹង និងផ្ដល់ការបណ្ដុះបណ្ដាលជំនាញវិជ្ជាជីវៈដល់នេនតូចៗ។
ចុងបញ្ចប់ នៃកម្មវិធីគណៈអធិបតីបានស្រោចស្រពសុគន្ធវារី ដល់គណសង្ឃវត្ត និងពិធីរាប់បាត្រដល់ព្រះសង្ឃផងដែរ៕
