ផ្ទាំងស្លាកប៉ាណូល្បែងស៊ីសងតាមអនឡាញដ៏ធំឈ្មោះថា«789BET , JUN 88 » នៅលើផ្លូវជាតិលេខ៥ ត្រង់ចំណុចក្បែររង្វង់មូលច្រកទ្វារអន្តរជាតិប៉ោយប៉ែត ត្រូវបានអាជ្ញាធរចុះរុះរើ
(ខេត្តបន្ទាយមានជ័យ)៖ក្រោយពីមានលិខិតបង្គាប់ការ របស់ក្រសួងមហាផ្ទៃ អនុវត្តតាមប្រសាសន៍ដឹកនាំដ៏ខ្ពង់ខ្ពស់របស់សម្តេចមហាបវរធិបតី នាយករដ្ឋមន្ត្រីនៃកម្ពុជា កាលពីថ្ងៃទី២៩ ខែកុម្ភៈ ឆ្នាំ២០២៤ ត្រូវបង្កើតគណៈកម្មាធិការចំពោះកិច្ច ដើម្បីបង្ក្រាបបទល្មើសឆបោកតាមប្រព័ន្ធអនឡាញ នៅតាមបណ្តារាជធានី–ខេត្តនោះ នាព្រឹកថ្ងៃទី២៨ ខែមិថុនា ឆ្នាំ២០២៤នេះ អាជ្ញាធរដឹកនាំដោយលោក ង៉ោ ម៉េងជ្រួន អភិបាលរងខេត្តបន្ទាយមានជ័យ និងលោក គាត ហ៊ុល អភិបាលក្រុងប៉ោយប៉ែត បានចុះទៅបញ្ជាឲ្យរុះរើស្លាកផ្ទាំងប៉ាណូល្បែងស៊ីសងតាមអនឡាញដ៏ធំ ដែលមានឈ្មោះថា“789BET , JUN 88 “នៅលើផ្លូវជាតិលេខ ៥ ត្រង់ចំណុចក្បែររង្វង់មូលច្រកទ្វារអន្តរជាតិប៉ោយប៉ែត ខេត្តបន្ទាយមានជ័យ ។
សូមបញ្ជាក់ផងដែរថា ផ្ទាំងប៉ាណូល្បែងស៊ីសងតាមអនឡាញដ៏ធំមួយនេះ មិនមែនទើបតែលើកដាក់នោះទេ បើតាមអង្គភាពយើងដឹងគឺរយៈការកន្លងមកនេះមានការរិះគន់ពីបណ្ដាញសង្គមហ្វេសប៊ុក ក៏ដូចជាបណ្ដាញសារព័ត៌មាន យ៉ាងចាស់ដៃផងដែរ។ ក្រោយមកអាជ្ញាធរក៏បានធ្វើការរុះរើចេញម្ដងរួចមកហើយដែរ ក៏ស្រាប់តែថ្មីៗនេះមានការលើកឡើងវិញសារជាថ្មីទៀត ហើយក៏មានការរិះគន់ជាបន្តបន្ទាប់ មិនឃើញអាជ្ញាធរចុះធ្វើការរុះសរើនោះឡើយ ទើបតែមានលិខិតបង្គាប់ការ របស់ក្រសួងមហាផ្ទៃ ចុះថ្ងៃទី២៧ ខែមិថុនា ឆ្នាំ២០២៤នេះទើបអាជ្ញាធរដឹកនាំកម្លាំងចុះរុះរើតែម្តងធ្វើឲ្យមានការភ្ញាក់ផ្អើល និងមានការសាទរពីប្រជាពលរដ្ឋ ព្រោះថាការផ្សព្វផ្សាយពាណិជ្ជកម្មល្បែងស៊ីសងវាជះឥទ្ធិពលអាក្រក់ដល់សង្គម។
គួរបញ្ជាក់ផងដែរថា កាលពីថ្ងៃទី២៧ ខែមិថុនា ឆ្នាំ២០២៤ រដ្ឋបាលសង្កាត់ប៉ោយប៉ែតបានចេញសេចក្តីជូនដំណឹងលេខ:០០៩/២៤ ស.ជ.ណ ជម្រាបជូនដល់បងប្អូនប្រជាពលរដ្ឋដែលប្រកបអាជីវកម្មរោងពុម្ពទាំងអស់ទូទាំងសង្កាត់ប៉ោយប៉ែត ក្នុងក្រុងប៉ោយប៉ែតចូលរួមចំណែកដល់ការអភិវឌ្ឍន៍ ថែរក្សា ទម្លៀមទម្លាប់ប្រពៃណីវប្បធម៌ ស្នាដៃអក្សរសាស្ត្រដ៏ល្អផូផង់ដែលជាអត្តសញ្ញាណជាតិ និងជាមរតកដ៏មានតម្លៃរបស់ជាតិយើង។ដូច្នេះ រដ្ឋបាលសង្កាត់ បានធ្វើការណែនាំត្រូវអនុវត្តដូចខាងក្រោម:
១/ ត្រូវដាក់តាំងស្លាកយីហោជាអក្សរខ្មែរនៅខាងលើ ។
២/ ស្លាកយីហោអាជីវកម្មទាំងអស់ ត្រូវសរសេរអក្សរបរទេសបន្ទាប់ពីអក្សរខ្មែរនៅផ្នែកខាងក្រោម និងត្រូវមានទំហំអក្សរមួយភាគីពី(១/២)នៃទំហំអក្សរខ្មែរ ។
៣/ ប្រសិនបើម្ចាស់អាជីវកម្មទេសចរណ៍មានបំណងប្រើប្រាស់អក្សរបរទេសទី ៣ អាចដាក់បាននៅផ្នែកខាងក្រោមបន្ទាប់ទៀត ដោយមានទំហំអក្សរមួយភាគពី(១/២)នៃទំហំអក្សរខ្មែរ ។
៤/ ខ្លឹមសារដូចបានណែនាំខាងលើនិងត្រូវអនុវត្តជាកាតព្វកិច្ចចំពោះម្ចាស់អាជីវកម្មរោងពុម្ព ទាំងអស់ទូទាំងសង្កាត់។ទទួលបានការជូនដំណឹងនេះប្រសិនបើរដ្ឋបាលសង្កាត់ពិនិត្យឃើញថាម្ចាស់អាជីវកម្មរងពុម្ពទាំងអស់មិនអនុវត្តតាម។ជូនដំណឹងខាងលើនេះទេ រដ្ឋបាលសង្កាត់និងអនុវត្តវិធានការតាមផ្លូវច្បាប់ឬផាកពិន័យនិងឈានដល់ការបិទអាជីវកម្មទាំងស្រុងក៏អាចថាបាន។ពាក់ព័ន្ធករណីខាងលើនេះប្រជាពលរដ្ឋបានសម្តែងការសាទរចំពោះចំណាត់ការរបស់អាជ្ញាធរ ហើយពួកគាត់សង្ឃឹមថា នៅក្រុងរបស់យើងមិនមានអក្សខ្មែរនៅពីក្រោមអក្សបរទេស និងស្លាកផ្ទាំងប៉ាណូពាណិជ្ជកម្មល្បែងស៊ីសង បន្តទៀត៕
