(បន្ទាយមានជ័យ)៖សាលា ធម្មសភាថ្មី ១ខ្នងដែលមានទទឹង ២៨ម៉ែត្របណ្ដោយ៣៦ម៉ែត្រ ដែលត្រូវចំណាយថវិកាអស់ចំនួន ២៨ ៩០០០ដុល្លារសហរដ្ឋអាមេរិក ស្ថិតនៅក្នុងវត្តទួលប្រាសាទ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ត្រូវបានធ្វើពិធីបុណ្យឆ្លងសម្ភោធកាត់ខ្សែបូរ នៅព្រឹកថ្ងៃទី១៤ ខែមិថុនា ឆ្នាំ២០២៤ ក្រោមអធិបតីភាព លោក ង៉ោ ម៉េងជ្រួន អភិបាលរងខេត្ត ។សមិទ្ធផលដ៏ធំដែលបានសម្ពោធឆ្លងនៅថ្ងៃនេះគឺបានមកពី សទ្ធាជ្រះថ្លា បងប្អូនសប្បុរសជនជិតឆ្ងាយ ដែលគោរពស្រឡាញ់ព្រះពុទ្ធសាសនា ធ្វេីឲ្យសមិទ្ធផលនេះរួចរាល់ជាស្ថាពរសម្រាប់ព្រះសង្ឃពុទ្ធបរិស័ទ ក្នុងពិធីបុណ្យផ្សេងៗ។
លោក គាត ហ៊ុល អភិបាលក្រុងប៉ោយប៉ែតបានលើកឡើងថា តំបន់នេះពីដើមឡើយគឺជាតបន់សង្គ្រាម និងពោរពេញទៅដោយគ្រាប់មីន តែដោយសារគោលនយោបាយឈ្នះឈ្នះ របស់សម្ដេចតេជោ ហ៊ុន សែន អតីតនាយករដ្ឋមន្ត្រីនៃព្រះរាជាណាចក្រកម្ពុជា បានធ្វើឲ្យប្រទេសកម្ពុជាទាំងមូល បាននូវសន្តិភាពពេញលេញចាប់ពីឆ្នាំ ១៩៩៨មកម្ល៉េះ។ លោក គាត ហ៊ុល បានបន្តថា យើងជាខ្មែរជាអ្នកជឿជាក់លើព្រះពុទ្ធសាសនាដ៏ច្រើនលើសលប ដូចនេះសាសនាគឺជាប្រភពផ្តល់នូវគុណតម្លៃដ៏សំខាន់ដែលមានឥទ្ធិពលមកលើរបបនយោបាយ ច្បាប់ វប្បធម៌ ប្រពៃណីទំនៀមទម្លាប់ ហេីយការប្រតិបត្តិតាមផ្នែកសាសនានៅក្នុងសង្គមជាតិ នីមួយៗ តែងមានជាប់ទាក់ទងនឹងប្រពៃណីទំនៀមទម្លាប់វប្បធម៌របស់ជាតិសាសន៍នោះផងដែ។ ដែលជា អត្តសញ្ញាណនិងគុណតម្លៃដឹកនាំជីវិតរស់នៅរបស់មនុស្ស ធ្វើឲ្យផ្នត់គំនិត ឥរិយាបថ សកម្មភាពមានភាពសមរម្យ មានលក្ខណៈល្អ អាចរស់នៅជាមួយគ្នាប្រកបដោយ សុដុមរមនា។
លោក ង៉ោ ម៉េងជ្រួន អភិបាលរងខេត្តបន្ទាយមានជ័យបានមានប្រសាសន៍ថា នៅក្នុងបរិបទនេះការអប់រំតាមរយៈព្រះពុទ្ធសាសនាកាន់តែមានតួនាទីចាំបាច់ ដើម្បីធានាថាការរីកចម្រើនទាំងសម្ភារៈ និងស្មារតីត្រូវតែមានល្បឿនស្មើគ្នា ការស្វែងរកភាពមានបានទាំងសម្ភារៈត្រូវ ក្នុងក្របខ័ណ្ឌច្បាប់យុត្តិធម៌ សមធម៌ សុជីវធម៌ សីលធម៌ និងគុណធម៌ ដូច្នេះវាពិតជាមានភាពចាំបាច់ និងបន្ទាន់ក្នុងការពន្យល់សង្គមមនុស្សឲ្យមើលឃើញពីគុណតម្លៃ និងផលប្រយោជន៍នៃការប្រព្រឹត្តត្រឹមត្រូវតាមធម៌វិន័យ ការគោរពច្បាប់បានលើកកម្ពស់ មនុស្សធម៍ សីលធម៌ គុណធម៌ និងការសន្សំបុណ្យកុសលដើម្បីបានជាបុណ្យកុសលរួមជួយឲ្យសង្គមមានសាមគ្គីធម៌ សុខដុមរមនា សន្តិភាពនិងការអភិវឌ្ឍប្រកបដោយចិរភាពនិងក៏ជាបុណ្យកុសលសម្រាប់ជីវិតបរលោក ានទៅកាន់សុគតិភពផង និងបរមសុខផង តាមមរមពុទ្ធោវាទ៕
