ឯកឧត្តម អ៊ុំ រាត្រី ដឹកនាំកិច្ចប្រជុំគណៈបញ្ជាការឯកភាព រដ្ឋបាលខេត្តបន្ទាយមានជ័យ
(បន្ទាយមានជ័យ)៖គណៈបញ្ជាការឯកភាពរដ្ឋបាលខេត្តបន្ទាយមានជ័យ ដឹកនាំដោយឯកឧត្តម អ៊ុំ រាត្រី អភិបាលខេត្តបន្ទាយមានជ័យ និងជាប្រធានគណៈបញ្ជាការឯកភាពខេត្ត នៅព្រឹកថ្ងៃទី២៥ ខែមេសា ឆ្នាំ២០២៣ បានបើកកិច្ចប្រជុំគណៈបញ្ជាការឯកភាពរដ្ឋបាលខេត្ត ដោយលើកយកនូវរបៀបវារៈសំខាន់ៗចំនួន៤ ដែលត្រូវលើកយកមកពិនិត្យពិភាក្សា។ក្រោយពីអស់លោក ឡើងធ្វើសេចក្ដីរាយការណ៍ជុំវិញស្ថានភាពនៅក្នុងខេត្តជាពិសេសបញ្ហាបងប្អូនប្រជាពលរដ្ឋឲ្យបានបន្តទៅធ្វើការរកស៊ីនៅប្រទេសថៃ ដោយខុសច្បាប់តាមច្រកតំបន់តាមច្រករបៀង មានជាហូរហែក្នុងនោះកងកម្លាំងប្រដាប់អាវុធក៏បានឃាត់ និងធ្វើការអប់រំដល់ពួកគាត់សុំធ្វើដំណើរទៅប្រទេសថៃឲ្យមានច្បាប់ទម្លាប់ត្រឹមត្រូវ។
ឯកឧត្តម អ៊ុំ រាត្រី បានមានប្រសាសន៍ថា របៀបវារៈក្នុងកិច្ចប្រជុំនេះមានសារសំខាន់ណាស់ ពិសេសការត្រៀមទទួលព្រះអគ្គីកីឡាស៊ីហ្គេមនិងអាស៊ីហ្គេមដែលត្រូវឆ្លងកាត់ចូលមកខេត្តបន្ទាយមានជ័យនាថ្ងៃទី២ ទី៣ ខែឧសភា ឆ្នាំ២០២៣ ខាងមុខនេះ ចំណុចសំខាន់មួយទៀតគឺការត្រៀមរៀបចំទិវាកាកបាទក្រហមក្នុងឱកាសអបអរសាទរខួបលើកទី១៦០ ទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ឆ្នាំ២០២៣ ក្រោមប្រធានបទរួមគ្នាជាមួយកាកបាទក្រហមកម្ពុជា ដើម្បីបរិយាបន្នសង្គម និងការងារត្រៀមផែនការ ការពារសន្តិសុខសណ្ដាប់ធ្នាប់ ការងារបោះឆ្នោតជ្រើសតាំងតំណាងរាស្ត្រនីតិកាលទី៧ នាពេលខាងមុខ។
ចុងក្រោយឯកឧត្តម អ៊ុំ រាត្រី បានថ្លែងការកោតសរសើរនិងអរគុណចំពោះឯកឧត្តម លោកជំទាវ មន្ទីរ អង្គភាព ស្ថាប័នពាក់ព័ន្ធអស់លោក លោកស្រី មន្ត្រីរាជការកងកម្លាំងប្រដាប់អាវុធទាំងអស់ដែលបានខិតខំយកចិត្តទុកដាក់បំពេញការងារបានយ៉ាងល្អ ធ្វើឲ្យខេត្តបន្ទាយមានជ័យទទួលបានភាពជោគជ័យទៅលើគ្រប់វិស័យតែថ្នាក់ដឹកនាំជាតិមានការទុកចិត្ត និងកោតសរសើរផងដែរ និងសូមបន្តចូលរួមជួយឲ្យអស់លទ្ធភាពបន្តទៀត ៕
