ទុសេខ្សែភ្លើង បណ្តាលឲ្យឆាប់ឆេះផ្ទះមួយល្វែង ធ្វើអំពីថ្មក្រោម ប្រក់ស័ង្កសី ខាងក្រោយផ្សាររាត្រីទឹកពុះ ក្នុងក្រុងប៉ោយប៉ែត
(បន្ទាយមានជ័យ)៖សង្ស័យទុសេខ្សែភ្លើង បណ្តាលឲ្យឆាប់ឆេះផ្ទះមួយល្វែង ធ្វើអំពីថ្មក្រោម ប្រក់ស័ង្កសី នៅចំណុចទំនប់ដីស ខាងក្រោយផ្សាររាត្រីទឹកពុះ ស្ថិតនៅក្នុងភូមិក្បាលស្ពាន១ សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ បង្កការភ្ញាក់ផ្អើលនៅវេលាម៉ោង៥និង៣០នាទីល្ងាច ថ្ងៃទី២៤ ខែកញ្ញា ឆ្នាំ២០២៤ ។
ក្រោយពីទទួលបានព័ត៌មានខាងលើនេះភ្លាម កម្លាំងសមត្ថកិច្ចចម្រុះមានកម្លាំងនគរបាលក្រុងប៉ោយប៉ែត,កម្លាំងកងរាជអាវុធហត្ថក្រុង,កម្លាំងយោធា ,កម្លាំងវរៈការពារព្រំដែន និងក្រុមសង្គ្រោះបឋមក្រុងប៉ោយប៉ែត រួមនិងអាជ្ញាធរមូលដ្ឋាន បាននាំយករថយន្តពន្លត់អគ្គីភ័យចុះជួយអន្តរាគមន៍ភ្លាមៗ ទាន់ពេលវេលា មិនបណ្ដាលឲ្យឆេះាលដាលដល់ផ្ទះអ្នកដទៃ និងមិនមានអ្នកណាម្នាក់រងគ្រោះថ្នាក់នោះឡើយគ្រាន់តែខូចខាតទ្រព្យសម្បត្តិនៅក្នុងផ្ទះបន្តិចបន្តួចតែប៉ុណ្ណោះ។
ប្រជាពលរដ្ឋបានប្រាប់ឲ្យដឹងថា មុនពេលកើតហេតុគឺចរន្តអគ្គីសនីបានដាច់ លុះពេលភ្លើងមកវិញចុងក្រោយក៏ស្រាប់តែមានសម្លេងផ្ទុះចេញពីក្នុងផ្ទះដែលត្រូវភ្លើងឆេះ ទើបមានអណ្តាតភ្លើងឆាប់ឆេះឡើងតែម្តង ហើយផ្ទះខាងលើនេះម្ចាស់ចាក់សោមិនសូវនៅផ្ទះជាប់លាប់នោះទេ ឃើញតែចេញចូល ។
ពួកគាត់បញ្ជាក់ថា ខ្លួនក៏ធ្លាប់ជួបបញ្ហាដូចនេះដែរ តែដោយសារពួកខ្លួននៅផ្ទះជាប្រចាំ ដូច្នេះនៅពេលកើតឡើងគឺពន្លត់ទាន់ពេលវេលា។
ពាក់ព័ន្ធករណីខាងលើនេះ មន្ត្រីពន្លត់អគ្គីភ័យបានឲ្យដឹងថា ការចុះជួយអន្តរាគមន៍នេះបានត្រៀមទឹកចំនួន ៤រថយន្ត តែប្រើប្រាស់អស់ចំនួន ៣ រថយន្ត ទើបរគ្រប់គ្រងស្ថានការបាន(លត់ជាស្ថាពរ)នៅវេលាម៉ោង៦និង៣០នាទី៕
