សម្ពោដាក់ឲ្យប្រើប្រាស់អគារសិក្សា ១ខ្នង ៥បន្ទប់ នៅសាលាបឋមសិក្សាអូរអណ្តូង ក្នុងស្រុកមង្គលបូរី
(បន្ទាយមានជ័យ)៖អគារសិក្សា ១ខ្នង ៥បន្ទប់ ស្ថិតនៅសាលាបឋមសិក្សាអូរអណ្តូង ភូមិអូរអណ្តូងកើត ឃុំបន្ទាយនាង ស្រុកមង្គលបូរី ខេត្តបន្ទាយមានជ័យ ដែលជាអំណោយរបស់អង្គការសម្រេចសុបិនកុមារកម្ពុជា ត្រូវបានសម្ពោធដាក់ឲ្យប្រើប្រាស់ជាផ្លូវការ នាព្រឹកថ្ងៃទី២៣ ខែកុម្ភៈ ឆ្នាំ២០២២ ក្រោមអធិបតីភាពលោក លី សារី អភិបាលរងខេត្ត តំណាងឱ្យឯកឧត្តម អ៊ុំ រាត្រី អភិបាលខេត្តបន្ទាយមានជ័យ លោក ឈូ ប៊ុនរឿង ប្រធានមន្ទីរអប់រំយុវជន និងកីឡាខេត្ត លោក រ័ត្ន ដាស៊ីណង់ អភិបាលស្រុកមង្គលបូរី ព្រមទាំងលោក លោកស្រី ប្រធាន.អនុប្រធានមន្ទីរ និងមេបញ្ជាការ មេបញ្ជាការងគ្រប់កង ឯកភាព មន្ទីរ អង្គភាពពាក់ព័ន្ធជុំវិញខេត្តផងដែរ។
នាឱកាសនោះលោក លី សារី អភិបាលរងខេត្ត បានសម្តែកការកោតសរសើរ និងថ្លែងនូវអំណរគុណ ដល់អង្គការសម្រេចសុបិនកុមារកម្ពុជា ដែលបានផ្តល់អគារសិក្សា ១ខ្នង ៥បន្ទប់ និងសមិទ្ធិផលនានា ដែលណាយថវិការសរុបប្រមាណជាង៥៦១៩៨ដុល្លា ជូនដល់សាលាបឋមសិក្សាអូរអណ្តូង លើទឹកដីស្រុកមង្គលបូរី ខេត្តបន្ទាយមានជ័យ។ជំនួយឧបត្ថម្ភដ៏ថ្លៃថ្លានេះបង្ហាញអំពីទឹកចិត្តសប្បុរសដ៏ល្អក្នុងការបរិច្ចាកធនធានមួយ ក្នុងការផ្តល់ជាប្រយោជន៍ដល់សិស្សានុសិស្ស នៅក្នុងសហគមន៍ ស្របតាមទិសដៅកំណែទម្រង់របស់ក្រសួងអប់រំ យុវជន និងកីឡា គឺ
ទី១.សមធម៌នៃការចូលរៀន
២.គុណភាព និងប្រសិទ្ធភាពនៃសេវាអប់រំ និង
ទី៣.ការកសាងសមត្ថភាព និងការអភិវឌ្ឍស្ថាប័ន ដែលកំពុងផ្តោតទៅលើវិធានការនានា ដើម្បីជម្រុញឱ្យមាតា បិតា សិស្ស ក្នុងសហគមន៍ ចូលរួមកាន់តែច្រើនក្នុងការគ្រប់គ្រង និងអភិវឌ្ឍសាលារៀន ក្នុងការលើកកម្ពស់គុណភាព នៃការសិក្សារបស់សិស្សនៅគ្រប់កម្រិត។
លោកអភិបាលរងខេត្តបញ្ជាក់ថា៖ការអប់រំ និងការអភិវឌ្ឍសិស្សានុសិស្ស គឺជាការវិនិយោគរយៈពេលវែង ដែលនិងផ្តល់ផលត្រឡប់វិញកម្រិតខ្ពស់ ជាពិសេសការវិនិយោគ ដើម្បីស្ថាបនាមនុស្សពេញលេញ ដែលជាកិច្ចការមួយក្នុងចំណោមកិច្ចការសំខាន់ៗ។ នាពេលបច្ចុប្បន្ននេះ ការអប់រំសិស្សានុសិស្ស នៅកម្ពុជាមានការរីចម្រើនគួរឱ្យកត់សម្គាល់។
ជាមួយគ្នានោះលោក លី សារី ក៏បានផ្តាំផ្ញើផងដែលដល់លោកគ្រូ អ្នកគ្រូ អាណាព្យាបាលសិស្ស ត្រូវចូលរួមថែទាំសាលាឲ្យបានជាប់គង់វង្សយូរអង្វែង។ជាពិសេសត្រូវយកចិត្តទុកដាក់បន្តអនុវត្តឱ្យបានជាប្រចាំ នូវវិធានការការពារសុខភាព សិស្សានុសិស្សតាមគោលការណ៍ ៣កុំ ៣ការពារ តាមការអប់រំផ្សព្វផ្សាយរបស់រាជរដ្ឋាភិបាល និងជួយគាំទ្រវិធានការការពារខ្លួនពីជំងឺកូវិដ–១៩ នៅក្នុងបរិបទ នៃការរីរាលដាលនៃមេរោគបំប្លែងថ្មីអូមីក្រុងនេះជាដើម៕
