ព័ត៌មានជាតិ

ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម បានបញ្ជាក់ថា គ្មានការដែលទុកបងប្អូនជនពិការឲ្យនៅដោយឡែក និងគ្មានទេការរើសអើងចំពោះបងប្អូនជនពិការ

កំពង់ចាម ៖ ព្រឹកថ្ងៃទី១៩ ខែធ្នូ ឆ្នាំ ២០២២ ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម អញ្ជើញជាអធិបតី ក្នុងទិវាជនមានពិការភាពកម្ពុជាលើកទី ២៤ និងអន្តរជាតិលើកទី ៤០ ក្រោមប្រធានបទ« ពិការភាពទាំងអស់មិនអាចកំណត់ ដោយការមើលនឹងភ្នែកនោះទេ » នៅសាលាស្រុកកំពង់សៀម ។

បន្ទាប់ពីអានសារលិខិតសម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ជូនដល់បងប្អូនជនពិការ នៅក្នុងទិវានេះ ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាមបានមានប្រសាសន៍លើកទឹកចិត្តដល់បងប្អូនជនពិការទាំងអស់ថា សូមឱ្យពិការតែរាងកាយ កុំឲ្យពិការផ្លូវចិត្ត និងកុំបណ្តែតបណ្តោយ ធ្វើឲ្យភាពពិការនោះធ្លាក់ចុះដុនដាប រហូតដល់ធ្វើអ្វីលែងកើត ក្នុងការរកចំណូលមកដោះស្រាយជីវភាពក្នុងគ្រួសារ ។

ឯកឧត្តមបានបញ្ជាក់ផងដែរថា រាជរដ្ឋាភិបាល ដែលមានសម្ដេចតេជោ ហ៊ុន សែន ជាប្រមុខ គឺបានដាក់ចេញនូវកម្មវិធីនយោបាយ ដើម្បីលើកកម្ពស់កម្រិតជីវភាពរបស់ជនមានពិការភាពច្រើនណាស់ ដើម្បីធ្វើយ៉ាងណាឱ្យបងប្អូន មានសមត្ថភាព និងមានលទ្ធភាពគ្រប់គ្រាន់ដើម្បីចូលរួម គ្រប់សកម្មភាពការងារនៅក្នុងសង្គម ទាំងការងាររដ្ឋនិងការងារឯកជន ។ ដូច្នេះត្រូវរួមគ្នាដើម្បីពង្រឹងខ្លួនយើង ពីព្រោះគ្មានទេការរើសអើងជនពិការ និងគ្មានទេការទុកជនពិការឲ្យនៅដោយឡែក ឬមិនបានយកមកដោះស្រាយ ។

ក្នុងឱកាសនោះដែរ លោក ឃុត សារ៉ាន តំណាងឲ្យបងប្អូនជនពិការក្នុងស្រុកកំពង់សៀម បានមានចំណាប់អារម្មណ៍ថា ក្នុងនាមជាជនមានពិការភាពជាមួយ និងបងប្អូនដែលមានពិការភាព ទូទាំងស្រុក ទទួលបាននូវគុណសណ្ដោសប្រណីដ៏ខ្ពង់ខ្ពស់ពី សម្តេចតេជោនាយរដ្ឋមន្រ្តី និងទប់ស្កាត់ការរើសអើងមកលើជនមានពិការភាព និងគ្រប់បញ្ហាដែលទាក់ទិនរាល់ទម្រង់នៃការងារ រួមទាំងលក្ខខណ្ឌនៃការជ្រើសរើសផងដែរ ។

លោកបន្តថា រូបលោក និងជនមានពិការភាពដទៃទៀត ដែលមានសមត្ថភាព និងមានឱកាសបានចូលបម្រើការងារនៅតាមក្រសួង ស្ថាប័ន និងវិស័យឯកជន ដើម្បីរួមអភិឌ្ឍន៍សង្គម ។ ក្នុងនោះខេត្តកំពង់ចាមរបស់យើង គឺមានភ័ព្វសំណាងដែលមានថ្នាក់ដឹកនាំដ៏ល្អ គឺ ឯកឧត្តម អ៊ុន ចាន់ដា អភិបាលខេត្ត តែងតែគិតគូរ និងយកចិត្តទុកដាក់ខ្ពស់ ដល់ជនមានពិការភាពគ្រប់ប្រភេទ ព្រមទាំងបានផ្តល់នូវគ្រឿងឧបភោគ បរិភោគ ថវិកា និងបានដោះស្រាយរាល់បញ្ហាជាច្រើន ចំពោះទុក្ខកង្វល់របស់បងប្អូនមានពិការភាពផងដែរ ៕

Related Articles

ឆ្លើយ​តប

អាសយដ្ឋាន​អ៊ីមែល​របស់​អ្នក​នឹង​មិន​ត្រូវ​ផ្សាយ​ទេ។ វាល​ដែល​ត្រូវ​ការ​ត្រូវ​បាន​គូស *

Back to top button
kmKhmer