អាជីវករខ្មែរលក់ដូរនៅផ្សាររោងក្លឿ ស្នើសុំឲ្យអាជ្ញាធរមានវិធានការតាមផ្លូវច្បាប់ ចំពោះអាខោន facebook ដែលបង្ហោះស្នើសុំផ្ទុយទៅនឹងប្រជាពលរដ្ឋជាច្រើនលើសលុបចង់បាន
ខេត្តបន្ទាយមានជ័យ៖ប្រជាពលរដ្ឋខ្មែរ ដែលជាអាជីវករ ពាណិជ្ជករ កម្មករ ជាច្រើននាក់ដែលរកទទួលទាននៅក្នុងទឹកដីថៃ ពិសេសផ្សាររោងក្លឿ បានសម្ដែងការកោតសរសើរចំពោះថ្នាក់ដឹកនាំខេត្ត ក្រុងប៉ោយប៉ែត ពិសេសប្រមុខរាជរដ្ឋាភិបាលកម្ពុជា ដែលតែងតែយកចិត្តទុកដាក់ចំពោះប្រជាពលរដ្ឋគ្រប់ទីកន្លែង មិនរើសអើង មិនប្រកាន់ពូជសាសន៍ ពណ៌សម្បុរ ឋានៈ និងបក្សនយោបាយណាឡើយ ឱ្យតែប្រជាពលរដ្ឋមានទុក្ខលំបាកណាមួយ អាជ្ញាធរ គ្រប់លំដាប់ថ្នាក់តែងតែចុះទៅដល់គោលដៅ ដើម្បីរកដំណោះស្រាយជូនពួកគាត់។ជាក់ស្ដែង ដូចជាករណីនៅច្រកទ្វារអន្តរជាតិប៉ោយប៉ែតជាដើម ក្រោយពីរទទួលបានព័ត៌មាន និងការស្នើសុំពីប្រជាពលរដ្ឋខ្មែរ ដែលជាអាជីវករ ពាណិជ្ជករ កម្មករ ដែលឆ្លងកាត់តាមច្រកទ្វារអន្តរជាតិប៉ោយប៉ែត ដើម្បីទៅរកទទួលទាន នៅក្នុងទឹកដីថៃ ពិសេសផ្សាររោងក្លឿតែម្តង ពាក់ព័ន្ធរឿងរកចំណូលមិនបាន(លក់មិនដាច់) តែចំណាយច្រើន ពិសេសទៅលើការចេញចូលប្រថាប់ត្រាម្ដង៥០បាត (ប្រាក់ថៃ) ស្មើជាង៥០០០រៀល ដោយខ្លះអាចចេញនិងចូលច្រើនដង ដោយយកកូនទៅសិក្សាជាដើម ។
ក្រោយពីទទួលបានការណែនាំពីឯកឧត្តមអភិបាលខេត្តបន្ទាយមានជ័យ ដើម្បីអនុវត្តតាមបទបញ្ជារបស់ប្រមុខថ្នាក់ដឹកនាំ លោក ង៉ោ ម៉េងជ្រួន អភិបាលរងខេត្ត និងលោក គាត ហ៊ុល អភិបាលក្រុង បានដឹកនាំកម្លាំង សហការជាមួយមន្ត្រីនគរបាលអន្តោប្រវេសន៍ច្រកទ្វារអន្តរជាតិប៉ោយប៉ែត ចុះធ្វើការសម្របសម្រួលជាមួយភាគីថៃ ឱ្យស្របទៅតាមនីតិវិធីច្បាប់ និងឲ្យស្របទៅតាមកាលៈទេសៈនៅក្នុងច្រកទ្វេភាគីរវាងកម្ពុជា–ថៃ រហូតឈានទៅដល់ការប្រថាប់ត្រាលើប័ណ្ណព្រំដែនឬហៅថា(បរិផាស)ក្នុងតម្លៃ ៥០បាត(ប្រាក់ថៃ)ស្មើនឹងជាង ៥.០០០ រៀល មិនយកថវិកាពីបងប្អូនប្រជាពលរដ្ឋខ្មែរ ដែលជាអាជីវករ ពាណិជ្ជករ កម្មករ ទាំងអស់ចាប់ពីថ្ងៃទី៦ ខែកក្កដា ឆ្នាំ២០២៣ តទៅ មិនមែនធ្វើត្រឹមតែពេលវេលាបោះឆ្នោតនៅថ្ងៃទី២៣ ខែកក្កដា ខាងមុខនេះទេ ព្រោះនេះជាគោលការណ៍របស់រដ្ឋបាលខេត្ត ក៏ដូចជាសំណើរសំណូមពររបស់ឯកឧត្តម ឧបនាយករដ្ឋមន្ត្រី កែ គឹមយ៉ាន ប្រធានក្រុមការងាររាជរដ្ឋាភិបាល ចុះជួយមូលដ្ឋាន ខេត្តបន្ទាយមានជ័យ ។
ជាមួយនឹងការប្រថាប់ត្រាលើប័ណ្ណព្រំដែនឬហៅថា(បរិផាស)មិនយកកម្រៃនេះដែរ ប្រជាពលរដ្ឋបានសំដែងការសប្បាយចិត្តជាខ្លាំង ពីព្រោះក្នុងអំឡុងនៃការផ្ទុះឡើងនៃជំងឺដ៏កាច់សាហាវកូវីដ១៩ និងក្រោយពីជំងឺនេះបានធូរស្បើយពួកគាត់លក់មិនដាច់ ឯចំណាយក៏ច្រើន ធ្វើឲ្យជីវភាពពួកគាត់ជួបលំបាកជាខ្លាំង។
ក្រោយពីប្រជាពលរដ្ឋបានសំដែងការអបអរសាទរ និងសប្បាយចិត្តជាខ្លាំងក្រោយពីទទួលបានការប្រថាប់ត្រាមិនយកថវិកានោះក៏ស្រាប់តែនាថ្ងៃទី៧ ខែកក្កដា ឆ្នាំ២០២៣ មានអាខោន facebook មួយចំនួនតូចបែជាស្នើសុំឱ្យយកកម្រៃប្រថាប់ត្រាដូចដើមទៅវិញ ព្រោះតែរឿងការយឺតយ៉ាវនៃការប្រថាប់ត្រាខាងភាគីថៃ ធ្វើឲ្យប្រជាពលរដ្ឋចូលទៅតម្រង់ជួរយូរ។
សូមបញ្ជាក់ផងដែរថា ការយឺតយ៉ាវនៃការថាប់ត្រា របស់ខាងភាគីថៃ និងតម្រង់ជួរយូរនេះ មិនមែនទើបតែកើតមានឡើងនោះទេ ពោលគឺយូមកហើយតាំងពីមុននៃការផ្ទុះជំងឺកូវីដ១៩ និងប្រើកាត សម្រាប់ចូលព្រឹកចេញល្ងាចមកម្ល៉េះ ។ទាំងនេះធ្វើឲ្យប្រជាពលរដ្ឋជាច្រើនសើសលុបមានការខឹងសម្បារជាខ្លាំ និងស្នើឱ្យអាជ្ញាធរមានវិធានការទៅលើអាខោន facebook ដែលបានស្មើឲ្យយកកម្រៃឡើងវិញនេះទៀតផង។
ដោយឡែកសម្រាប់អាជ្ញាធរខេត្ត ក្រុង វិញក្រោយពីទទួលបានព័ត៌មានថា ប្រជាពលរដ្ឋចូលទៅទឹកដីថៃទម្រង់ជួរយូរដោយសារការប្រថាប់ត្រាខាងភាគីថៃ មានការយឺតយ៉ាវ(មិនទាន់)នោះ លោក ង៉ោ ម៉េងជ្រួន អភិបាលរងខេត្ត និងលោក គាត ហ៊ុល អភិបាលក្រុង បានបន្តដឹកនាំក្រុមការងារ ចុះទៅសម្របសម្រួលជាមួយភាគីថៃ និងសួរសុខទុក្ខបងប្អូនប្រជាពលរដ្ឋយើងយ៉ាងកក់ក្តៅ ផងដែរ ។ដូច្នេះស្នើឱ្យអ្នកមួយចំនួនតូចបញ្ឈប់ការយករឿងដែលប្រជាពលរដ្ឋកំពុងទាមទារនិងចង់បាន ទៅបង្ហោះដើម្បីធ្វើឲ្យខាត់បង់ប្រយោជន៍ប្រជាពលរដ្ឋចំនួនច្រើន ព្រោះតែតម្រូវការខ្លួនឯងចង់បាននោះបន្តទៀត៕
