អភិបាលខេត្តបន្ទាយមានជ័យ និងលោកជំទាវ ព្រមទាំងមន្ត្រីរាជការ អញ្ជើញចូលរួមបុណ្យកាន់វេនបិណ្ឌទី៣ នៅវត្តគិរីជុំចំការខ្នុរ ក្រុងសិរីសោភ័ណ
ខេត្តបន្ទាយមានជ័យ៖នាព្រឹកថ្ងៃទី០២ ខែតុលា ឆ្នាំ២០២៣ ឯកឧត្តម អ៊ុំ រាត្រី អភិបាលខេត្តបន្ទាយមានជ័យ និងលោកជំទាវ ជ័យ ណារី អ៊ុំ រាត្រី ព្រមទាំងអស់លោក លោកស្រី មន្ត្រីរាជការ បានអញ្ជើញចូលរួមកាន់វេនបិណ្ឌទី៣ ក្នុងវត្តគិរីជុំចំការខ្នុរ ក្រុងសិរីសោភ័ណ ដោយកម្មវិធីបានរៀបចំទៅតាមបែបប្រពៃណីខ្មែរយើងជាហូរហែរ។
ក្នុងបុណ្យកាន់វេនបិណ្ឌទី៣ នេះផងដែរ ឯកឧត្តម លោកជំទាវ អស់លោក លោកស្រី ក៏បាននាំយកនូវទេយ្យទានមួយចំនួនរួមមាន អង្ករ មី ទឹកភេសជ្ជៈ ទឹកសុទ្ធ និងបានប្រគេនបច្ច័យសរុបចំនួន ៦,៧០០,០០០រៀល ព្រះសង្ឃ ៣៣ អង្គ ក្នុងមួយអង្គៗ ៦ម៉ឺនរៀល តាជី យាយជី ចុងភៅម្នាក់ៗទទួលបាន ២ម៉ឺនរៀល។
ឯកឧត្តម អ៊ុំ រាត្រី អភិបាលខេត្តបន្ទាយមានជ័យបានមានប្រសាសន៍ថា យើងទាំងអស់គ្នាបាននឹងកំពុងសប្បាយរីករាយ ជ្រះថ្លានិងបុណ្យកុសលទាំងអស់គ្នា ក៏ដោយសារប្រទេសជាតិយើង មាននូវសុខសន្តិភាពពេញលេញនោះ ជាក់ស្ដែងកម្ពុជាដែលពីមុនធ្លាប់ត្រូវបានហែកហួរ ដោយសង្គ្រាមធ្លាប់ល្បីថាជាវាលពិឃាត ជាតំបន់អសន្តិសុខ ចង្ការមីនដែលគេភ័យខ្លាចគ្រប់គ្នា ឥឡូវបានខ្លាចជារដ្ឋអធិបតេយ្យ ឯករាជ្យ សន្តិភាព នីតិរដ្ឋ ស្ថេរភាពនយោបាយស្របតាមគោលការណ៍ នៃលទ្ធិប្រជាធិបតេយ្យសេរីពហុបក្ស និងមានព្រះមហាក្សត្រ គង់ប្រថាប់ជាម្លប់ជាទីគោរពសក្ការៈ។
ឯកឧត្តម អ៊ុំ រាត្រី ក៏បានធ្វើការអំពាវនាវដល់បងប្អូនប្រជាពលរដ្ឋទាំងអស់ ដែលរស់នៅតាមដងស្ទឹងសិរីសោភ័ណ ដងស្ទឹងមង្គលបូរី និងរស់នៅតំបន់ទំនាបក្ដី សូមធ្វើការប្រុងប្រយ័ត្នចំពោះទឹកជំនន់ ក្រែងមានការជន់លិចដូចឆ្នាំមុនៗទៀត និងប្រយ័ត្នក្មេងៗពេលងូតទឹកលេងសប្បាយ ក្រែងលង់ទឹកនោះ តែអ្វីដែលយើងគួរដឹងច្បាស់ថា នៅប៉ែកខាងលើពិសេសនៅខេត្តប៉ៃលិនទឹកបានស្រកចុះបណ្ដើរៗហើយ នេះតាមការឲ្យដឹងពីអាជ្ញាធរខេត្តប៉ៃលិនបានផ្ដល់ដំណឹងមក ប៉ុន្តែទឹកនៅតែបន្តស្រុងមកយើង នឹងអាចមានលិចនៅតំបន់ទាបមួយចំនួន។
ក្នុងឱកាសបុណ្យកាន់វេនទី៣ នេះផងដែរ ព្រះសមណៈញ្ញាណ ណាប់ ម៉ឺន ព្រះបាឡាត់គណខេត្ត និងជាព្រះគ្រូចៅអធិការវត្ត គិរីជុំចំការខ្នុរ ព្រះអង្គបានមានសង្ឃដីកា ថ្លែងអំណរគុណយ៉ាងជ្រាលជ្រៅបំផុតចំពោះ ឯកឧត្តម លោកជំទាវ អស់លោក លោកស្រី ប្រជាពុទ្ធបរិស័ទទាំងអស់ ជួបប្រទះតែពុទ្ធពរ ៥ ប្រការ គឺអាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ ហើយបច្ច័យដែលទទួលបានទាំងអស់នេះ និងផ្គត់ផ្គង់សម្រាប់កសាងនូវសមទ្ធិផលនានាបន្តទៀត៕
