(បន្ទាយមានជ័យ)៖ស្ត្រីគ្រប់រូបគួរស្វែងយល់និងគិតគូរដាក់ផែនការឲ្យបានច្បាស់លាស់ មុននឹងមានផ្ទៃពោះ ព្រោះថាបើយើងទទួលយកកូនញឹកពេក វាអាចប៉ះពាល់ដល់សុខភាពម្ដាយ នឹងអាចមានផលលំបាកផ្នែកជីវភាពផងដែរ ។ការលើកឡើងរបស់លោកស្រី សុខ លាភា មន្ត្រីសាខាកាកបាទក្រហមខេត្តបន្ទាយមានជ័យ បានធ្វើឡើងនាឱកាសចុះផ្សព្វផ្សាយអប់រំ ស្ដីពីអត្ថប្រយោជន៍នៃការយល់ដឹងពីសុខភាពបន្តពូជនិងការថែទាំសុខភាពមាតា ទារក ពេលមានផ្ទៃពោះពេលសម្រាលនិងក្រោយសម្រាល ក្នុងនោះមានស្ត្រីមានផ្ទៃពោះចំនួន៤២នាក់មកពីតាមបណ្ដាភូមិក្នុងសង្កាត់អូរអំបិល ក្រុងសេរីសោភ័ណ នៅមណ្ឌលសុខភាពអូរអំបិលនាព្រឹកថ្ងៃទី១៥ ខែកក្កដា ឆ្នាំ២០២២។
ក្នុងការចុះអប់រំផ្សព្វផ្សាយ ស្ដីពីការយល់ដឹងចំពោះស្ត្រីមានផ្ទៃពោះនេះផងដែរ លោកស្រី សុខ លាភា ក៏បានធ្វើការអាននូវសារលិខិតរបស់ សម្ដេចកិត្តិព្រឹទ្ធបណ្ឌិតប៊ុនរ៉ានី ហ៊ុន សែន ប្រធានកាកបាទក្រហមកម្ពុជានិងជាឥស្សរជនឆ្នើមថ្នាក់ជាតិ នៃផែនការសកម្មភាពរួម អគ្គលេខាធិការអង្គការសហប្រជាជាតិ ដើម្បីសុខភាពស្ត្រីនិងកុមារ។ ជាមួយទស្សនៈខាងលើនេះ សម្ដេចកិត្តិព្រឹទ្ធបណ្ឌិតក៏បានធ្វើការអំពាវនាវ សូមស្ត្រីមានផ្ទៃពោះទាំងអស់ទៅពិនិត្យសុខភាព ពីគ្រោះយោបល់ជាមួយគ្រូពេទ្យ ឆ្មបជំនាញនៅមណ្ឌលសុខភាព ឬមន្ទីរពេទ្យដែលនៅជិតផ្ទះឱ្យបានទៀងទាត់ចំនួន ៤ដង តាមពេលវេលានិងការណែនាំរបស់គ្រូពេទ្យ ទទួលថ្នាំបង្ការជំងឺតេតាណូស នឹងថ្នាំបង្ការជំងឺកូវីដ១៩ ទទួលយកសេវាបង្ការព្យាបាលទាំងអស់ ពិសេសការស្ម័គ្រចិត្តធ្វើតេស្តឈាមរកមេរោគអេដស៍ ស្វាយ រលាកថ្លើមប្រភេទបេ ដើម្បីរួមគ្នាលុបបំបាត់ការចម្លងមេរោគពីម្ដាយទៅកូន។
សូមទៅសម្រាលកូននៅមណ្ឌលសុខភាព ឬមន្ទីរពេទ្យដែលមានគ្រូពេទ្យឬឆ្មបជំនាញដែលទទួលបានការបណ្ដុះបណ្ដាលត្រឹមត្រូវ។សូមបំបៅកូនដោយទឹកដោះម្ដាយតែមួយមុខគត់ចាប់ពីពេលទារកកើតភ្លាមរហូតដល់ទារកមានអាយុ ៦ខែ។សូមឱ្យស្ត្រីមានផ្ទៃពោះ ស្ត្រីជាមាតាកំពុងបំបៅកូនដោយទឹកដោះម្ដាយទាំងអស់ អនុវត្តឱ្យបានខ្ជាប់ខ្ជួននូវវិធានការការពារ “៣ការពារ ៣កុំ” និងការណែនាំនានារបស់ក្រសួងសុខាភិបាល និងសូមទៅទទួលវ៉ាក់សាំងបង្ការជំងឺកូវី១៩ តាមវេន និងកាលកំណត់ឱ្យបានគ្រប់គ្នា។
ដោយពេលវេលានិងបច្ចុប្បន្ននេះជាពេលនៃរដូវវស្សា មានភ្លៀងធ្លាក់ជាបន្តបន្ទាប់ អាចបណ្ដាលឱ្យមានមូសខ្លា ដែលជាភ្នាក់ងារចម្លងជំងឺគ្រុនឈាមដល់មនុស្សយើង ពិសេសកុមារតូចៗវាអាចសម្លាប់យើងបាន បើយើងមានការធ្វេសប្រហែសុំដូចនេះក្នុងកម្មវិធីផ្សព្វផ្សាយស្ត្រីមានផ្ទៃពោះនេះផងដែរ កញ្ញា សិទ្ធិស៊ីណាត មន្ត្រីសាខាកាកបាទក្រហមខេត្ត ក៏បានឡើងធ្វើបទបង្ហាញ ស្ដីពីបញ្ហាប្រឈមជម្ងឺគ្រុនឈាម ដូចនេះរួមគ្នាកំចាត់ប្រភពមូសខ្លា ពិសេសសម្អាតបរិស្ថានជុំវិញផ្ទះយើងជាប្រចាំ៕ដោយៈលោក ពិល ថា
