(បន្ទាយមានជ័យ)៖ដើម្បីជាការតបស្នងសងគុណ ដែលមានគុណូបការៈលើសិស្សគណទាំងឡាយជាកូនល្អ សិស្សល្អ និងប្រជាពលរដ្ឋល្អនោះ នាថ្ងៃសៅរ៍ អាទិត្យ ទី៩–១០ ខែកក្កដា ឆ្នាំ២០២២ ប្រជាពុទ្ធបរិស័ទជិតឆ្ងាយព្រមទាំងសិស្សគណសរុប១០៧០នាក់/អង្គ ក្នុងស្រុកមង្គលបូរី បានប្រារព្ធរៀបចំពិធីបុណ្យចម្រើនព្រះជន្ម ប្រគេនចំពោះព្រះមន្ត្រីសង្ឃស្រុករួមមាន ព្រះភូមិញាណ សំវីរៈ ព្រះគ្រូអនុគណស្រុកមង្គលបូរី ព្រះគ្រូ អង្កុរធម្មោ សៀង សុង ព្រះវិន័យធរស្រុកនិងព្រះគ្រូ ព្រហ្មសារោ រស់ សុម៉ាលី ព្រះធម្មធរស្រុក ក្នុងនោះក៏មានពិធីក្បួនដង្ហែនិងពិធីផ្សេងៗទៅតាមបែបព្រះពុទ្ធសាសនា នៅវត្តឬស្សីក្រោកស្រុកមង្គលបូរី លុះដល់ថ្ងៃបង្ហើយទី១០ ខែកក្កដា ឆ្នាំ២០២២ ក៏មានការចូលរួមពីសំណាក់ឯកឧត្តម អ៊ុំ រាត្រី អភិបាលខេត្តបន្ទាយមានជ័យនិងលោកជំទាវ និងព្រះមេគណៈខេត្តទាំងពីគណៈបាននិមន្តចូលរួម។
ក្នុងកម្មវិធីចម្រើនព្រះជន្ម ព្រះមន្ត្រីសង្ឃស្រុកនាឱកាសនេះឯកឧត្តម អ៊ុំ រាត្រី អភិបាលខេត្តបានមានប្រសាសន៍ថា តាំងនាមឲ្យរដ្ឋបាលខេត្ត និងក្នុងនាងខ្ញុំព្រះករុណា ខ្ញុំផ្ទាល់ សូមសម្ដែងនូវក្ដីមោទនភាពទទួលអំណរសាទរចំពោះលទ្ធផលជាផ្លែផ្កា ដែលព្រះមន្ត្រីសង្ឃ ព្រះសង្ឃ អាចារ្យ គណៈកម្មការ សប្បុរសជន នឹងពុទ្ធបរិស័ទជិតឆ្ងាយបានរួបរួមសាមគ្គីគ្នា កសាងនូវសមិទ្ធផលនានានៅតាមវត្តអារាមសម្រាប់ជាប្រយោជន៍សាធារណៈ ជាពិសេសនៅក្នុងវត្ត វេឡុវនារាម (ឫស្សីក្រោក) ស្រុកមង្គលបូរីមានព្រះមន្ត្រីសង្ឃ ព្រះសង្ឃ និងពុទ្ធបរិស័ទជាសិស្សគណគ្រប់រូប បានរៀបចំពិធីប្រគេនព្រះរាជក្រឹត្យ និងប្រកាសនីយបត្រ នឹងពិធីបុណ្យចម្រើនព្រះជន្មប្រគេនព្រះមន្ត្រីសង្ឃសាលាអនុគណស្រុកមង្គលបូរីចំនួន៣អង្គ
១.ព្រះភូមិញាណសំ វីរៈ ព្រះរាជាគណៈថ្នាក់កិត្តិយសនិង ជាព្រះគ្រូសិរីមង្គល ព្រះអនុគណស្រុកមង្គលបូរី
២.ព្រះគ្រូអង្កុរធម្មោ សៀង សុង ព្រះវិន័យធរអនុគណស្រុកមង្គលបូរីនិង
ទី៣.ព្រះគ្រូ វិមលសីលញាណ រស់ សុម៉ាលី ព្រះធម្មធរអនុគណស្រុកមង្គលបូរី ដែលមានគុណូបការៈលើសិស្សគណទាំងឡាយ ទាំងអស់នេះគឺជាការបញ្ជាក់អំពីការគោរពដឹងគុណ ហើយជាការធ្វើតបគុណចំពោះអ្នកមានគុណ និងជាកូនល្អ ជាសិស្សល្អ និងជាប្រជាពលរដ្ឋល្អនៅក្នុងសង្គម។
ឯកឧត្តម អ៊ុំ រាត្រី មានប្រសាសន៍បន្តថា តាមប្រវត្តិសាស្ត្របានបង្ហាញឲ្យឃើញថា ទីអារាមរួមចំណែកក្នុងការកសាងសង្គមជាតិមួយប្រកបដោយសីលធម៌ ចរិយាធម៌ និងប្រកបដោយគុណធម៌ និងជាទីកន្លែងដែលរក្សាទុកនូវវប្បធម៌ ប្រពៃណី ទំនៀមទម្លាប់ ដែលបុព្វបុរសខ្មែរកត់ត្រាទុកពីជំនាន់មួយទៅជំនាន់មួយ សម្រាប់មនុស្សជំនាន់ក្រោយ ពិសេសទៅទៀតទីអារាមជាកន្លែងបណ្ដុះនូវធនធានមនុស្សដែលពោរពេញដោយចំណេះដឹងទាំងផ្លូវលោក ផ្លូវធម៌ និងប្រកបដោយមនសិការជាតិ ជៀសវាងនូវអំពើអកុសល នឹងធ្វើតែអំពើជាកុសល។ យើងទាំងអស់គ្នាជាពុទ្ធសាសនិក ត្រូវតែខិតខំថែរក្សានិងគោរពឱ្យបានខ្ជាប់ខ្ជួននូវពុទ្ធឱវាទរបស់ព្រះសម្មាសម្ពុទ្ធនៃយើង ដើម្បីឱ្យព្រះពុទ្ធសាសនាគង់វង្សគម្រប់៥ពាន់ព្រះវស្សា។
គួរបញ្ជាក់ថាក្នុងកម្មវិធីបុណ្យចម្រើនព្រះជន្មនេះផងដែរ ឯកឧត្តម អ៊ុំ រាត្រី និងលោកជំទាវបានប្រគេនថវិកាចំនួន៤លានរៀល ដល់ព្រះសង្ឃ ដើម្បីចាត់ចែងប្រើប្រាស់ផ្សេងៗផងដែរ ៕ដោយ ៖ លោក ពិល ថា
