ខេត្តបន្ទាយមានជ័យ៖ពាក្យចាស់បុរាណលោកពោលថា ខ្មោចក្នុងមិនឲ្យដៃ ខ្មោចក្រៅមិនដឹងនោះទេ ដូចនេះកំហែកពោះ ឲ្យក្អែកចិក ។លោក យឹម សំណាង អភិបាលរងខេត្តបន្ទាយមានជ័យថ្លែងបែបនេះក្នុងកិច្ចប្រជុំរៀបចំជ្រើសរើសរចនាសម្ព័ន្ធបំពេញបន្ថែម ព្រះមន្ត្រីសង្ឃនៃស្រុកអូរជ្រៅនាថ្ងៃទី២៣ ខែមករា ឆ្នាំ២០២៤។
លោក បៀវ ថាន ប្រធានមន្ទីរធម្មការនិងសាសនាខេត្តបន្ទាយមានជ័យបានឲ្យដឹងថា យោងតាមសេចក្តីប្រកាសរបស់ក្រសួងធម្មការនិងសាសនាបានបញ្ជាក់យ៉ាងច្បាស់ថា រចនាសម្ព័ន្ធស្រុកក្រុងខេត្ត ត្រូវតែមាន ព្រះមន្រ្តីសង្ឃ ឲ្យគ្រប់នៅតាមឋានានុក្រម បើខ្វះចន្លោះត្រូវជ្រើសរើសបំពេញបន្ថែមជាបន្ទាន់។ជាក់ស្តែងថ្ងៃនេះ មន្ទីរធម្មការនិងសាសនាខេត្តបន្ទាយមានជ័យបានសហការជាមួយគណៈសង្ឃខេត្តបានធ្វើការរៀបចំពិធីប្រកាសជ្រើសរើសព្រះមន្ត្រីសង្ឃស្រុកអូរជ្រៅព្រោះថា ព្រះអនុគណចាស់លោកលាចាកសិក្ខាបទ ដូចនេះសម្រេចប្រកាសព្រះ សុប្បភាតោ ភាច សឺត ជាអនុគណស្រុកអូរជ្រៅស្តីទីចាប់ពីពេលនេះតទៅ។ព្រះឧត្តមសីលញ្ញាណ ធុល សុធា ព្រះមេគណខេត្ត បានមានសង្ឃដីកាថា ការប្រកាសនូវព្រះគ្រូអនុគណថ្មីនាពេលនេះគឺយើង ប្រជុំពិភាក្សាយ៉ាងល្អិតល្អន់ចំពោះបុគ្គលដែលត្រូវឡើងមកគ្រប់គ្រងបន្តទៀតត្រូវមានលក្ខណសម្បត្តិសមរម្យមានចំណេះដឹងសីលធម៌អត្តចរិតល្អជាគំរូគេ ល្អស្អាតគ្មាននិន្នាការឬបញ្ហាអ្វីនោះឡើយ។ចុងក្រោយលោក យឹម សំណាង បានធ្វើការផ្ដាំផ្ញើដល់ព្រះមន្ត្រីសង្ឃស្រុកអូរជ្រៅគ្រប់ព្រះអង្គ យ៉ាងណាត្រូវពង្រឹងគុណភាពក្នុងការដឹកនាំឲ្យមានរបៀបរៀបរយមានសាមគ្គីភាពផ្ទៃក្នុងល្អរក្សានូវតម្លៃព្រះពុទ្ធសាសនា ចៀសវាងការប្រកាន់បក្ខពួក បន្តអធិករណ៍ធ្វើឱ្យប្រជាពុទ្ធបរិស័ទបាត់បង់នូវជំនឿអាចជះឥទ្ធិពលអាក្រក់ដល់ព្រះពុទ្ធសាសនាដែលយើង ព្រោះថាមនុស្សជាច្រើននាក់នៅលើពិភព ជននេះបានចាត់ទុកព្រះពុទ្ធសាសនាគឺជាសាសនានៃសុខសន្តិភាព៕
