ព័ត៌មានជាតិ
ផ្លូវបេតុងអាមេប្រវែង៤៥១ម៉ែត្រ និងប្រវែង៩ម៉ែត្រ ស្ថិតក្នុង សង្កាត់តាខ្មៅ ត្រូវបានសម្ភោធដាក់អោយប្រើប្រាស់ជាផ្លូវការ
ខេត្តកណ្តាល៖ព្រឹកថ្ងៃទី ២៤ ខែមេសា ឆ្នាំ ២០២២ ឯកឧត្តមបណ្ឌិត ម៉ៅ ភិរុណ ប្រធានក្រុមប្រឹក្សាខេត្តកណ្តាល និងជាប្រធានក្រុមការងាររាជរដ្ឋាភិបាលចុះជួយក្រុងតាខ្មៅ បានអញ្ជើញជាអធិបតី ក្នុងពិធីសម្ភោធដាក់អោយប្រើប្រាស់ជាផ្លូវការ ផ្លូវបេតុងអាមេប្រវែង៤៥១ម៉ែត្រ ទទឹង ៥,៥ម៉ែត្រ និង៩ម៉ែត្រ កម្រាស់ ០,១៥ម៉ែត្រ និងដាក់លូមូលប្រវែង ២៨២ម៉ែត្រ មុខកាត់ ០.៦ម៉ែត្រ និងរ៉ឺហ្គា ១៤កន្លែង នៅភូមិថ្មី និងភូមិថ្មី២ សង្កាត់តាខ្មៅ ក្រុងតាខ្មៅ ខេត្តកណ្តាល។
ឯកឧត្តមបណ្ឌិត ម៉ៅ ភិរុណ បានមានប្រសាសន៍ថា៖ ការដាក់អោយដំណើរការផ្លូវបេតុងអាមេនាពេលនេះគឺជាសមិទ្ធផលថ្មី បន្ថែមទៀតដ៏មានសារៈសំខាន់ជាទីបំផុត សំរាប់បងប្អូនប្រជាពលរដ្ឋក្នុងមូលដ្ឋានសង្កាត់តាខ្មៅ ក៏ដូច ជាប្រជាជនទូរទៅឆ្លងកាត់ សម្រួលក្នុងការធ្វើដំណើរ ការដឹកជញ្ជូនគ្រប់ប្រភេទ បានយ៉ាងងាយស្រួល និងជួយរំដោះទឹកជំនន់ដោយទឹកភ្លៀង ដែលជួយជម្រុញនូវកំណើនសេដ្ឋកិច្ចគ្រួសារប្រជាជន ដើម្បីរួមចំណែកកាត់បន្ថយភាពក្រីក្រក្នុងមូលដ្ឋាន។
ឯកឧត្តមបានបន្តថា៖ សមិទ្ធិផលដែលកើតចេញពីការដឹកនាំប្រកបដោយឆន្ទះ និងការរួមសាមគ្គីនេះហើយ បានធ្វើអោយស្ថានភាព សេដ្ឋកិច្ច សង្គម របស់ប្រជាជន កាន់តែត្រូវបានលើកកម្ពស់កាន់តែប្រសើ
រឡើងថែមទៀតផង និងបានវាយតម្លៃខ្ពស់ចំពោះកិច្ចខិតខំប្រឹងប្រែងបំពេញការងាររបស់រដ្ឋបាលក្រុងតាខ្មៅ ក្នុងការអនុវត្តតួនាទី ភារកិច្ច របស់ខ្លួនសម្រេចបានសមិទ្ធផលជាច្រើន រួមទាំងការងារសន្តិសុខ សណ្ដាប់ធ្នាប់សាធារណៈ ការងារអភិវឌ្ឍន៍ សេដ្ឋកិច្ច សង្គម ពិសេសការផ្ដល់សេវារដ្ឋបាល សេវាសាធារណៈជូនប្រជាពលរដ្ឋបានយ៉ាងល្អប្រសើរ។
ឯកឧត្តមបណ្ឌិតប្រធានក្រុមប្រឹក្សាខេត្ត បានគូសបញ្ជាក់ថា៖ ក្រោមការដឹកនាំរបស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្រ្ដី នៃព្រះរាជាណាចក្រកម្ពុជា វិស័យហេដ្ឋារចនាសម្ព័ន្ធបាន ក្លាយជាសរសៃឈាម ដ៏ចម្បងក្នុងវិស័យកសិកម្ម ពាណិជ្ជកម្ម ឧស្សាហកម្ម និងការដឹកជញ្ជូនទំនិញគ្រប់ប្រភេទ។
ឯកឧត្តមបន្ថែមថា៖ រាជរដ្ឋាភិបាលកម្ពុជា បច្ចុប្បន្នបានយកចិត្តទុកដាក់ និងគិតគូរដល់បងប្អូនប្រជាពលរដ្ឋ ហើយក៏បានកំពុងបន្តកសាងផ្លូវគមនាគមន៍ និងហេដ្ឋារចនាសម្ព័ន្ធ ជាច្រើន ផ្សេងៗទៀត ដើម្បីទុកជាសម្បត្តិសាធារណៈ បម្រើឱ្យការធ្វើដំណើរ និងដឹកជញ្ជូន ជាពិសេសបានលើកស្ទួយកម្រិតជីវភាពរបស់បងប្អូនប្រជាពលរដ្ឋអោយមានភាពប្រសើរឡើងថែមមួយកម្រិតទៀតផងដែរ ។
ក្នុងឱកាសនោះឯកឧត្តម បានសំណូមពរដល់បងប្អូនប្រជាពលរដ្ឋទាំងអស់ក្នុងខេត្តកណ្តាល អញ្ជើញទៅចាក់វ៉ាក់សាំងការពារជំងឺកូវីដ-១៩អោយបានគ្រប់ៗគ្នាដើម្បីចៀសឆ្ងាយពីជំងឺដ៏កាចសាហាវនេះ និងត្រូវគោរពតាមវិធានការណ៍របស់រាជរដ្ឋាភិបាល ក៏ដូចក្រសួងសុខាភិបាល ៣ការពារ ៣កុំ អោយបានខ្ជាប់ខ្ជួន៕
