គណៈបញ្ជាការឯកភាពខេត្តបន្ទាយមានជ័យ បន្តចុះត្រួតពិនិត្យការសាងសង់បង្គោលព្រំ និងលើកផ្លាកប៉ាណូផែនទី កំណត់ព្រំប្រទល់ដីតំបន់៣ ព្រៃលិចទឹកនៃបឹងទន្លេសាប
ខេត្តបន្ទាយមានជ័យ:ឯកឧត្តម អ៊ុំ រាត្រី ប្រធានគណៈបញ្ជាការឯកភាពខេត្ត និងជាអភិបាលខេត្ត នៅថ្ងៃទី១២ ខែធ្នូ ឆ្នាំ ២០២១ បានដឹកនាំគណៈបញ្ជាការឯកភាពខេត្ត មានកម្លាំងកងរាជអាវុធហត្ថដឹកនាំដោយលោកឧត្តមសេនីយ៍ត្រី បោនប៊ិន មេបញ្ជាការកងរាជអាវុធហត្ថខេត្ត កម្លាំងនគរបាលដឹកនាំដោយលោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្ត
បានចុះត្រួតពិនិត្យការសាងសង់បង្គោលព្រំ និងលើកផ្លាកប៉ាណូផែនទី កំណត់ព្រំប្រទល់ដី តំបន់៣ ព្រៃលិចទឹក នៃបឹងទន្លេសាប ស្ថិតក្នុងភូមិសាស្រ្តខេត្តបន្ទាយមានជ័យ ចំនួន២គោលដៅ
១/នៅចំណុចវាលអន្លក់ ស្ថិតក្នុងភូមិស្រណាល ឃុំសំបួរ ស្រុកមង្គលបូរី ខេត្តបន្ទាយមានជ័យ
២/នៅចំណុចអាងលីសំអាង ស្ថិតក្នុងភូមិក្របៅ ឃុំភ្នំលៀប ស្រុកព្រះនេត្រព្រះ ខេត្តបន្ទាយមានជ័យ ។
ការចុះត្រួតពិនិត្យការសាងសង់បង្គោលព្រំ និងលើកផ្លាកប៉ាណូផែនទី កំណត់ព្រំប្រទល់ដីតំបន់៣ ព្រៃលិចទឹកនៃបឹងទន្លេសាបនេះបានធ្វើឡើងបន្ទាប់ពីទទួលបានបទបញ្ជារបស់សម្ដេចតេជោ ហ៊ុន សែន នាយករដ្ឋមន្ត្រី នៃកម្ពុជា និងក្រោយពីកិច្ចប្រជុំបន្ទាន់មួយរបស់ក្រុមការងារថ្នាក់ជាតិដែលដឹកនាំដោយឯកឧត្តម ជា សុផារ៉ា ឧបនាយករដ្ឋមន្ត្រី និងរដ្ឋមន្ត្រីក្រសួងរៀបចំដែនដី នគរូបនីយកម្មនិងសំណង់ នាយឧត្តមសេនីយ៍ សៅ សុខា អគ្គមេបញ្ជាការរងកងយោធពលខេមរភូមិន្ទនិងជាមេបញ្ជាការកងរាជអាវុធហត្ថផ្ទៃប្រទេស ឯកឧត្តម សាយ សំអាល់ រដ្ឋមន្ត្រីក្រសួង បរិស្ថាន ឯកឧត្តម វេង សាខុន រដ្ឋមន្ត្រីកុរសួងកសិកម្ម រុក្ខាប្រមាញ់ និងនេសាទរួចមក។
ឯកឧត្តម អ៊ុំ រាត្រី បានឲ្យដឹងថាដំណើរការកំណត់និងបែងចែកតំបន់គ្រប់គ្រង និងការរៀបចំផផែនការគ្រប់គ្រងតំបន់ការពារធម្មជាតិនេះ ពិតជាមានសារៈសំខាន់ណាស់ និងមានគោលបំណង ដើម្បីផ្តល់ចំណេះដឹង ទូលំទូលាយ និងចែករំលែកបទពិសោធន៍ អំពីវិធីសាស្ត្រ នៃការរៀបចំកំណត់បែងចែកតំបន់គ្រប់គ្រង និងរៀបចំផែនការ គ្រប់គ្រងសម្រាប់ប្រព័ន្ធតំបន់ការពារធម្មជាតិ និងផ្សព្វផ្សាយតាមរយៈការបង្កើនសមត្ថភាព ដល់មន្ត្រី តំបន់ការពារធម្មជាតិ និងស្ថាប័នពាក់ព័ន្ធ ដើម្បីឱ្យយល់ច្បាស់ពីដំណើរការ នៃការកំណត់បែងចែកតំបន់គ្រប់គ្រង និងរបៀបនៃការរៀបចំផែនការគ្រប់គ្រងតំបន់ការពារធម្មជាតិ និងចូលរួមគ្រប់គ្រងប្រកបដោយប្រសិទ្ធភាពខ្ពស់ផងដែរ ។
ឯកឧត្តម បញ្ជាក់ថា អាជ្ញាធរមានសមត្ថកិច្ចគ្រប់លំដាប់ថ្នាក់ត្រូវយល់ឲ្យបានច្បាស់អំពីគោលការណ៍ណែនាំ ស្តីពីការកំណត់ និងការបែងចែកតំបន់គ្រប់គ្រងក្នុងតំបន់ការពារធម្មជាតិ មូលដ្ឋាន នៃការធ្វើសារពើភ័ណ្ឌព្រៃឈើ ការសិក្សាស្រាវជ្រាវអំពីជីវចម្រុះ និងការប្រមូលទិន្នន័យសម្រាប់កំណត់បែងចែកតំបន់គ្រប់គ្រងក្នុង
តំបន់ការពារធម្មជាតិ ព្រមទាំងតំបន់សហគមន៍ តំបន់ប្រើប្រាស់ដោយចីរភាព ជាពិសេសការផ្ទៀងផ្ទាត់ផែនទី ជាមួយចូលរួមក្នុងការអនុវត្ត ឲ្យបានត្រឹមត្រូវ និងសមស្របបំផុតផងដែរ៕