ពិធីកាត់ឬសីមា និសម្ពោធឆ្លងសមិទ្ធផនានានៅវត្តប្រាសាទស្រះកណ្ដាលខ្ចាស់ ស្រុកព្រះនេតព្រះខេត្តបន្ទាយមានជ័យ ក្រោមអធិបតីភាពឯកឧត្តម នាយឧត្តមសេនីយ៍ ឧបនាយករដ្ឋមន្ត្រី កែ គឹមយ៉ាន
(បន្ទាយមានជ័យ)៖ព្រះវិហារដ៏ល្អស្អាតធំស្គឹមស្កៃ មានរចនាបទខ្មែរពិតៗ ដែលបានចំណាយពេលសាងសង់អស់រយៈពេល ១០ ឆ្នាំ ក្នុងវត្តប្រាសាទស្រះកណ្ដាលខ្ចាស់ ស្ថិតក្នុងឃុំបុស្បូវ ស្រុកព្រះនេតព្រះ ខេត្តបន្ទាយមានជ័យ ត្រូវបានធ្វើពិធីកាត់ឬសីមា សម្ពោធឆ្លងសមិទ្ធនានានៅព្រឹកថ្ងៃទី០១ ខែឧសភា ឆ្នាំ ២០២៣ ក្រោមអធិបតីភាព ឯកឧត្តម នាយឧត្តមសេនីយ៍ ឧបនាយករដ្ឋមន្ត្រី កែ គឹមយ៉ាន តំណាងដ៏ខ្ពង់ខ្ពស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា លោកជំទាវ ញែម សាខន សម្ដេចក្រឡាហោម ស ខេង និងលោកជំទាវឧកញ៉ា អគ្គមហាឧបាសិកា ពុទ្ធសាសរូបត្ថម្ភ បណ្ឌិត ម៉ៅ ម៉ាល័យ កែ គឹមយ៉ាន។
គួរបញ្ជាក់ថា វត្តប្រាសាទស្រះកណ្ដាលខ្ចាស់នេះ ត្រូវបានរៀបចំធ្វើពិធីបុណ្យទៅតាមបែបព្រះពុទ្ធសាសនា អស់រយៈពេល១ខែពេញ ចាប់ពីថ្ងៃទី០១ ខែមេសា ដល់ថ្ងៃទី០១ ខែឧសភា ទើបបានបញ្ចប់ក្នុងរយៈពេល១ខែ យើងសង្កេតឃើញបងប្អូនប្រជាពុទ្ធបរិស័ទជិតឆ្ងាយក្នុងនិងក្រៅប្រទេស ក៏បាននិមន្តអញ្ជើញចូលរួមក្នុងពិធីបុណ្យយ៉ាងច្រើនកុះករ ស្ទើររាល់ថ្ងៃព្រោះថា វត្តនេះមានលក្ខណៈល្អស្អាត ប្រណិតជាងគេ ទីធ្លាធំទូលាយ បរិស្ថានល្អស្អាត និងបានចាត់ទុកវត្តនេះជាប់លំដាប់លេខ១ ទូទាំងប្រទេសមូលហេតុម្យ៉ាង សមិទ្ធផលជាច្រើនព្រមទាំងមានសាលាពុទ្ធិកសិក្សា សមណៈសិស្សរៀនសូត្រ ដោយបច្ចុប្បន្ននេះមានសមណៈសិស្សប្រមាណជាង ៣០០០ អង្គហើយ។
ថ្លែងនាឱកាសនេះផងដែរ ឯកឧត្តម កែ គឹមយ៉ាន បានមានប្រសាសន៍ថា យើងទាំងអស់គ្នាបានជួបជុំគ្នាធ្វើបុណ្យរួមគ្នា នាពេលនេះគឺស្ថិតនៅក្រោមម្លប់សន្តិភាព ក្រោមនយោបាយឈ្នះឈ្នះរបស់សម្ដេចតេជោ ហ៊ុន សែន ធ្វើឲ្យប្រទេសជាតិមានសុខសន្តិភាពពេញលេញ ចាប់ពីឆ្នាំ ១៩៩៨មក។
ឯកឧត្តមបានបន្តថា ការចូលរួមទាំងស្មារតី សម្ភារៈនិងបញ្ញាញាណពីព្រះតេជគុណ គ្រប់ព្រះអង្គ ព្រមទាំងឯកឧត្តម លោកជំទាវ លោកឧកញ៉ា លោក លោកស្រី និងប្រជាជនទាំងអស់ ដើម្បីរួមគ្នាកសាងកម្ពុជា ឱ្យក្លាយទៅជាសង្គមមួយដែលមានការអភិវឌ្ឍរីកចម្រើន គ្មានអំពើហិង្សា គ្មានការរំលោភសិទ្ធិ និងសេចក្ដីថ្លៃថ្នូររបស់មនុស្ស ចូលរួមចំណែកធ្វើឲ្យសង្គមកម្ពុជា ឱ្យនៅតែជាសង្គមមួយដែលមានមូលធនសង្គមដ៏រឹងមាំ ពោលគឺជាសង្គមមួយដែលមានប្រជាជនប្រកបដោយចំណេះដឹងជ្រៅជ្រះ មានសីលធម៌ គុណធម៌ ចរិយាធម៌ សាមគ្គីធម៌ និងជាប្រទេសដែលសម្បូររុងរឿង បន្តនូវអរិយធម៌កំពង់ស្ពស់ត្រចេះត្រចង់ប្រកបដោយសុខសន្តិភាពជានិរន្តរ៍។
ជាចុងក្រោយគណៈអធិបតីបានបំពាក់គ្រឿងឥស្សរិយស មេដាយប្រគេនដល់ព្រះតេជគុណ អស់លោក លោកស្រី ព្រមទាំងបានប្រគេនស៊ីម៉ង់ត៍ ៣០០តោន ដែក ១០០តោន សម្រាប់សាងសង់សមិទ្ធផលបន្ត ព្រមទាំងបានចែកជូនដល់សមាគមនុស្សចាស់ ចូលរួមឃីត១ថង់ និងប្រជាពលរដ្ឋចូលរួម សារុងម្នាក់១ផងដែរ៕
