កិច្ចប្រជុំ ត្រួតពិនិត្យលើការគ្រប់គ្រងតំបន់សហគមន៍ ដែលប្រជាពលរដ្ឋអាស្រ័យផលជាក់ស្តែង
(បន្ទាយមានជ័យ)៖យោងតាមអនុសាសន៍របស់សម្ដេចតេជោ ហ៊ុន សែន នាយករដ្ឋមន្ត្រី នៃកម្ពុជា កាលពីថ្ងៃទី៣ ខែកក្កដា ឆ្នាំ២០២០ បញ្ជាក់ថា រដ្ឋមន្ត្រីក្រសួងបរិស្ថាន ក្រសួងកសិកម្មរុក្ខាប្រមាញ់និងនេសាទ ក្រសួងរៀបចំដែនដី នគរូបនីយកម្មនិងសំណង់ និងរដ្ឋបាលថ្នាក់ក្រោមជាតិ ត្រូវកាត់ឆ្វៀលដីនិងផ្ដល់គំរូផ្ទៃដីជូនដល់ប្រជាពលរដ្ឋដែលបានកាន់កាប់ និងអាស្រ័យផលជាក់ស្តែងយូរឆ្នាំនៅលើទីតាំងដី ដែលស្ថិតនៅក្នុងផែនទីតំបន់ការពារធម្មជាតិ និងគម្រោងព្រៃឈើនៅតាមបណ្ដាខេត្តនានា ត្រូវបន្ថែមតាមត្រៀមបម្រុងដីចំនួន១០% សម្រាប់ការប្រើប្រាស់រួម របស់សហគមន៍ ដើម្បីបង្ការកុំឲ្យក្លាយជាសង្គ្រាមដីធ្លីនោះ នៅថ្ងៃទី២៥ ខែមីនា ឆ្នាំ២០២២ រដ្ឋបាលខេត្តបន្ទាយមានជ័យ និងប្រតិភូក្រសួងបរិស្ថានបានរៀបចំប្រជុំផ្សព្វផ្សាយជំរុញ និងការត្រួតពិនិត្យលើការងារគ្រប់គ្រងស្នើសុំសម្រួលព្រំនៃតំបន់គ្រប់គ្រងជាតំបន់សហគមន៍ បានប្រជាពលរដ្ឋ បានប្រើប្រាស់អាស្រ័យផលជាក់ស្ដែង និងផ្ដល់កម្មសិទ្ធិដីស្របច្បាប់ជូនប្រជាពលរដ្ឋ។
លោក អោម ចន្ថា អភិបាលរងខេត្តបន្ទាយមានជ័យ បានមានប្រសាសន៍ថា ក្នុងភូមិសាស្រ្តខេត្តបន្ទាយមានជ័យមានតំបន់ការពារធម្មជាតិចំនួន១០ មានផ្ទៃដីសរុប៥៨៧៩៥ហិកតា។
លោកជំទាវ មុំ ថានី រដ្ឋលេខាធិការក្រសួងបរិស្ថានបានមានប្រសាសន៍ថា បញ្ហាដីធ្លីស្ទើរគ្រប់ទីកន្លែងគឺមានភាពស្មុគស្មាញពិបាកដោះស្រាយ។ ដូចនេះយើងទាំងអស់គ្នា ត្រូវធ្វើការអនុវត្តទៅតាមអនុសាសន៍ដ៏ខ្ពង់ខ្ពស់របស់សម្តេចតេជោ ហ៊ុន សែន ស្ដីពីការរៀបចំធ្វើការវះកាត់ឆ្វៀល នឹងផ្តល់នូវកម្មសិទ្ធិដី ជូនដល់ប្រជាពលរដ្ឋរ ដែលបានកាន់កាប់ដី អាស្រ័យផលជាក់ស្តែងយូរឆ្នាំមកហើយ។ចំពោះដំណើរការចុះអនុវត្តដោយផ្ទាល់ជាក់ស្ដែង ឱ្យបានច្បាស់លាស់ ក្រសួងស្ថាប័នពាក់ព័ន្ធនិងរដ្ឋបាលថ្នាក់ក្រោមជាតិ ត្រូវទប់ស្កាត់ដាច់ខាតកុំឲ្យមានការរុករានទន្ទ្រានដី ដោយខុសច្បាប់ ដើម្បីបង្ការកុំឲ្យក្លាយជាសង្គ្រាមដីធ្លី នឹងតាមដានទប់ស្កាត់ការកាប់រុករានទន្ទ្រានដីគ្រប់គ្រងឲ្យបាន នូវការលួចកាប់រុករានយកដីមកធ្វើកម្មសិទ្ធិដោយខុសច្បាប់ ៕
