អាជ្ញាធរក្រុងប៉ោយប៉ែត ចុះកាត់រុះរើសំណង់ការ្យអាណាធិបតេយ្យផ្សេងៗ ដែលសាងសង់រំលោភចូលចំណីផ្លូវសាធារណៈ ដែលមិនព្រមអនុវត្តតាមការណែនាំរបស់រដ្ឋបាលក្រុង
ខេត្តបន្ទាយមានជ័យ៖សំណង់ការ្យអាណាធិបតេយ្យផ្សេងៗ ដែលសាងសង់រំលោភចូលចំណីផ្លូវសាធារណៈ ធ្វើឲ្យប៉ះពាល់ និងបាត់បង់នូវសោភ័ណភាពរបៀបរៀបរយក្នុងក្រុង ដែលរយៈការកន្លងមកនេះរដ្ឋបាលក្រុងប៉ោយប៉ែតបានចេញសេចក្តីប្រកាសព័ត៌មានជាច្រើនលើកច្រើនសារ អាជ្ញាធរមូលដ្ឋានក៏បានចុះណែនាំ រហូតចុះបាញ់គំនូសកំណត់ឱ្យរុះរើដោយស្ម័គ្រចិត្តហើយដែរ តែរហូតមកដល់ថ្ងៃទី២៩ ខែសីហា ឆ្នាំ២០២៣ ដែលជាថ្ងៃកំណត់ បែរជាម្ចាស់ក្រុមហ៊ុន សហគ្រាស អាជីវករ ពាណិជ្ជករ និងបងប្អូនប្រជាពលរដ្ឋ ដែលបានសាងសង់សំណង់ សំយ៉ាប លើកស្លាកយីហោ និងលក់ដូរលើចំណីផ្លូវសាធារណៈ ស្ថិតនៅក្នុងទីប្រជុំជនក្រុងប៉ោយប៉ែត ខេត្តបន្ទាយមានជ័យ ពិសេសនៅតាមបណ្ដោយផ្លូវជាតិលេខ៥ មិនព្រមរុះរើ និងអនុវត្តតាមការណែនាំរបស់អាជ្ញាធរក្រុង ។
ទើបកម្លាំងចម្រុះមាន នគរបាល អាវុធហត្ថ មន្ត្រីជំនាញរដ្ឋបាលក្រុង ចៅសង្កាត់ ដែលដឹកនាំបញ្ជាផ្ទាល់ដោយលោក គាត ហ៊ុល អភិបាលនៃគណៈអភិបាលក្រុង និងមានការសម្របសម្រួលនិតិវិធីពីលោក លឹម ប៊ុនសុភ័ក្រ្ត ព្រះរាជអាជ្ញារង អមសាលាដំបូង ខេត្តបន្ទាយមានជ័យ ចុះកាត់រុះរើ ដោយមិនយោគយល់ និងស្មើភាពគ្នាទាំងអស់ ពីព្រោះនាពេលខាងមុខនេះ រដ្ឋបាលក្រុង នឹងរៀបចំផ្លូវថ្មើរជើងថ្មីមួយសងខាងផ្លូវជាតិលេខ៥ ចាប់ពីរង្វង់មូលច្រកទ្វារព្រំដែនអន្តរជាតិ រហូតដល់មុខវត្តរតនរាមផ្សារកណ្ដាល នឹងរៀបចំផ្លូវថ្មើរជើងផ្សេងៗទៀតនៅតាមដងផ្លូវសំខាន់ៗ ក្នុងទីប្រជុំជនក្រុង ។
ដើម្បីធានាបាននូវសណ្ដាប់ធ្នាប់ សោភ័ណភាព របៀបរៀបរយសាធារណៈ និងការធ្វើចរាចរណ៍ឲ្យបានកាន់តែល្អប្រសើរ ឲ្យសាកសមជាឈ្មោះទីក្រុង ព្រោះថាក្រុងប៉ោយប៉ែតជាក្រុងមួយដែលមានសក្កានុពលសេដ្ឋកិច្ច និងមានភ្ញៀវជាតិ – អន្តរជាតិចេញចូលជាប្រចាំតាមច្រកទ្វារអន្តរជាតិប៉ោយប៉ែត និងជាការលើកមុខមាត់ប្រទេសជាតិយើងផងដែរ។
លោក គាត ហ៊ុល អភិបាលក្រុង បានឱ្យដឹងថា មុននឹងចុះអនុវត្តរុះរើនេះ រដ្ឋបាលក្រុងក៏ដូចជាសង្កាត់ បានចុះធ្វើការណែនាំច្រើនលើកច្រើនសារនិងទុកពេលឱ្យរើសរើដោយស្ម័គ្រចិត្ត យូរថ្ងៃមកហើយដែរ មិនមែនប្រាប់ភ្លាមអនុវត្តភ្លាមនោះទេ ប៉ុន្តែបងប្អូនយើងហាក់បីដូចជាមិនយកចិត្តទុកដាក់អនុវត្តតាមការណែនាំរបស់អាជ្ញាធរក្រុងទាល់តែសោះ ដូច្នេះលោកបន្តអំពាវនាវដល់បងប្អូនប្រជាពលរដ្ឋចូលរួមសហការទាំងអស់គ្នា ដើម្បីទីក្រុងរបស់យើងមានសោភ័ណភាព ហើយការចុះអនុវត្តរបស់អាជ្ញាធរ មិនមែនធ្វើមួយថ្ងៃឈប់នោះឡើយ ពោលគឺធ្វើដូចភ្លៀងរលឹមទាល់តែអស់ ។
សូមបញ្ជាក់ផងដែរថា តាមសេចក្តីជូនដំណឹងរបស់រដ្ឋបាលក្រុងប៉ោយប៉ែត បានកំណត់ឱ្យប្រជាពលរដ្ឋ ដែលបានសាងសង់សំណង់ សំយ៉ាប លើកស្លាកយីហោ និងលក់ដូរលើចំណីផ្លូវសាធារណៈ កាត់រុះរើកចេញនោះ ដោយផ្លូវជាតិលេខ ៥ ត្រូវដកគម្លាតពីចិញ្ចើមផ្លូវប្រវែង ៥ម៉ែត្រទាំងសងខាង និងតាមផ្លូវបេតុងសំខាន់ៗក្នុងទីប្រជុំជនមួយចំនួនទៀតត្រូវថយពីចិញ្ចើមផ្លូវប្រវែង ៣ម៉ែត្រទាំងសងខាងផងដែរ ៕
