ពិធីបុណ្យកាត់ឬសសីមាវត្ត ជម្ពូវណ្ណារាមក្បាលទន្សោង ស្រុកថ្មពួក ក្រោមអធិបតីភាព ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងលោកជំទាវ
ខេត្តបន្ទាយមានជ័យ៖ព្រះវិហារដ៏តូចច្រឡឹងស្រស់ស្អាត ស្ថិតនៅវត្តវត្ត ជម្ពូវណ្ណារាមក្បាលទន្សោង ក្នុងឃុំបន្ទាយឆ្មារ ស្រុកថ្មពួក ខេត្តបន្ទាយមានជ័យ ដោយព្រះវិហារនេះត្រូវចំណាយអស់ថវិកាចំនួន១៨៣,៣៩៣ ដុល្លារសហរដ្ឋអាមេរិក ដែលជាសទ្ធាជ្រះថ្លារបស់ឯកឧត្តមលោកជំទាវប្រជាពុទ្ធបរិស័ទជិតឆ្ងាយរួមកសាង រួចរាល់ជាស្ថាពរនិងត្រូវបានរៀបចំបុណ្យកាត់ឬសសីមាក្រោមអធិបតីភាពដ៏ខ្ពង់ខ្ពស់ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងលោកជំទាវ កែ សួន សុភី ស សុខា នាព្រឹកថ្ងៃទី១៦ ខែមករា ឆ្នាំ២០២៤ ។
ឯកឧត្តម អ៊ុំ រាត្រី អភិបាលខេត្តបន្ទាយមានជ័យ បានមានប្រសាសន៍ថា៖ក្រោយថ្ងៃរំដោះ ៧ មករា ឆ្នាំ១៩៧៩ ក្រោមការដឹកនាំរបស់រណសិរ្សសាមគ្គីសង្គ្រោះជាតិកម្ពុជា បានធ្វើឲ្យ វិស័យព្រះពុទ្ធសាសនាត្រូវបានបង្កើតឡើងវិញនិងរីកចម្រើនយ៉ាងឆាប់រហ័ស ដោយសាររាជរដ្ឋាភិបាលក្រោមការ ដឹកនាំប្រកបដោយគតិបណ្ឌិតរបស់សម្តេចតេជោ អតីតនាយករដ្ឋមន្ត្រី បានផ្ដល់នូវសិទ្ធិសេរីភាពពេញ លេញខាងជំនឿសាសនា ធ្វើឲ្យប្រជាពលរដ្ឋទូទាំងប្រទេសមានទឹកចិត្តសប្បាយរីករាយប្រកបដោយជំនឿមុតមាំមក លើរាជរដ្ឋាភិបាល បានរួបរួមគ្នាបង្កើតវត្តឡើងវិញនៅទូទាំងប្រទេស ពុទ្ធបរិស័ទទាំងក្នុងនិងក្រៅប្រទេសបរិច្ចាគ ដោយសទ្ធាជ្រះថ្លារួមចំណែកជាមួយរាជរដ្ឋាភិបាលកសាងស្ថាបនាទីអារាម ទីសក្ការបូជាផ្សេងៗ រីកលូតលាស់ឥតឈប់ឈរពីមួយថ្ងៃទៅមួយថ្ងៃ។
ថ្លែងទៅកាន់លោកតាលោកយាយបងប្អូនប្រជាពលរដ្ឋចូលរួមនាឱកាសនោះ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានមានប្រសាសន៍ថ្លែងនូវអំណរព្រះគុណ អរគុណចំពោះព្រះតេជគុណ ឯកឧត្តម លោកជំទាវ ពុទ្ធបរិស័ទជិតឆ្ងាយ ដែលមានសទ្ធាជ្រះថ្លា រួមសាមគ្គីគ្នាជួយកសាង សមិទ្ធ ផលនានាក្នុងវត្ត គឺជាការផ្សារភ្ជាប់មិនអាចខ្វះបានរវាងផ្នែកអាណាចក្រ និងពុទ្ធចក្រ និងក៏សូមធ្វើការកោត សរសើរដោយស្មោះចំពោះស្មារតីយកចិត្តទុកដាក់ គាំទ្រថវិកា កសាងព្រះវិហារក៏ដូចជាសមិទ្ធផលក្នុងវត្ត ដែលបានលះបង់ ទ្រព្យសម្បត្តិផ្ទាល់ខ្លួន ទុកជាសម្បត្តិ មនុស្សជាតិ ក្នុងការរក្សាបាននូវ ប្រពៃណីទំនៀមទម្លាប់ ដែលដូនតាបានរក្សាទុក ដើម្បីជាគំរូដ៏ប្រពៃថ្លៃថ្លា សម្រាប់កូនចៅជំនាន់ក្រោយ គោរពប្រតិបត្តិ ព្រោះថា ព្រះពុទ្ធសាសនា គឺជាសាសនានៃសុខសន្តិភាព។
ទន្ទឹមនោះឯកឧត្តម ស សុខា ក៏បានធ្វើការផ្ដាំផ្ញើក្រើនរំលឹកដល់បងប្អូនប្រជាពលរដ្ឋ ក្រុមយុវជនគឺធ្វើយ៉ាងណាគោរពច្បាប់ចរាចរណ៍ផ្លូវគោក គ្មានអំពើហិង្សា គ្មានការប្រើប្រាស់ជួញដូរគ្រឿងញៀនគ្រប់ប្រភេទនិងគ្មានក្មេងទំនើង បងតូចបងធំនោះឡើយ។ ចុងបញ្ចប់កម្មវិធីគណៈអធិបតី ក៏បានចែកជូនអំណោយដល់លោកតា លោកយាយ ព្រមទាំងបានចែកជូនសារុងដល់ប្រជាពលរដ្ឋចូលរួមផងដែរ៕
