(បន្ទាយមានជ័យ)៖ក្រសួងការងារ និងបណ្ដុះបណ្ដាលវិជ្ជាជីវៈដឹកនាំដោយឯកឧត្ដម សោម ចំណាន រដ្ឋលេខាធិការក្រសួងការងារ និងលោកស្រី រស់ សុផានី អភិបាលរងខេត្តបន្ទាយមានជ័យ បានអញ្ជើញជាអធិបតីភាពក្នុងការបើកវគ្គបណ្តុះបណ្តាលកសាងសមត្ថភាពសមាជិកគណៈកម្មការខេត្តបន្ទាយមានជ័យ សម្រាប់អនុវត្តនូវគោលនយោបាយជាតិស្ដីពីមុខរបរ និងការងារឆ្នាំ២០១៥ ២០២៥។
លោកស្រី រស់ សុផានី អភិបាលរងខេត្ត និងឯកឧត្ដម សោម ចំណាន រដ្ឋលេខាធិការក្រសួងការងារនិងបណ្តុះបណ្តាលវិជ្ជាជីវៈបានមានប្រសាសន៍ថា ក្រោមការផ្ដួចផ្ដើមរបស់រាជរដ្ឋាភិបាលកម្ពុជា ក្រសួងការងារនិងបណ្តុះបណ្តាលវិជ្ជាជីវៈបានចំណាយពេលប្រាំឆ្នាំធ្វើការសិក្សាស្រាវជ្រាវ និងរៀបចំសេចក្ដីព្រាង គោលនយោបាយជាតិស្ដីពីមុខរបរនិងការងារកម្ពុជាឆ្នាំ ២០១៥ ២០២៥ ដែលមានកិច្ចសហការនិងជំនួយបច្ចេកទេសពីអង្គការអន្តរជាតិខាងការងារ។គោលនយោបាយជាតិមួយនេះ ត្រូវបានរាជរដ្ឋាភិបាលអនុម័តនៅថ្ងៃទី៤ ខែកញ្ញា ឆ្នាំ២០១៥ និងត្រូវបានប្រកាសជាផ្លូវការដាក់ឲ្យអនុវត្តនៅថ្ងៃទី២២ ខែតុលា ឆ្នាំ២០១៥ ក្រោមអធិបតីភាពដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។
ឯកឧត្តមបានបន្តថា វគ្គបណ្ដុះបណ្ដាលនេះពិតជានឹងផ្តល់នូវការយល់ដឹងបន្ថែមទៀត សម្រាប់ការអនុវត្តនូវគោលនយោបាយជាតិស្ដីពីមុខរបរនិងការងារឆ្នាំ ២០១៥ ២០២៥ នៅខេត្តបន្ទាយមានជ័យ កាន់តែមានប្រសិទ្ធភាពដើម្បីចូលរួមចំណែកក្នុងដំណើរការធ្វើការផ្លាស់ប្តូរនិងលើកស្ទួយការគ្រប់គ្រងវិស័យការងារនិងមុខរបរនៅកម្ពុជាឲ្យសមស្របតាមការប្រែប្រួល និងផ្លាស់ប្តូរនានានៅក្នុងរចនាសម្ព័ន្ធឧស្សាហកម្មដែលត្រូវតែវិវឌ្ឍខ្លួនពីឧស្សាហកម្មអតិពលកម្មទៅជាឧស្សាហកម្មផលិតកម្មអាចនឹង នាងនៅឆ្នាំ២០២៥ ដូចជាការលើកកម្ពស់ការប្រកួតប្រជែងផលិតភាពកាន់តែខ្ពស់ប្រែក្លាយពីឧស្សាហកម្មមានតម្លៃបន្ថែមទាបទៅជាឧស្សាហកម្មមានតម្លៃបន្ថែមខ្ពស់ ចូលរួមក្នុងការអភិវឌ្ឍសេដ្ឋកិច្ចជាតិឲ្យមានកំណើនខ្ពស់ប្រកបដោយចិរភាព និងបរិយាប័ន្នសម្រាប់ធានាភាពសុខដុមនៃសង្គមទន្ទឹមនឹង ការលើកកម្ពស់សមត្ថភាពការងារជាបណ្តើរៗសម្រាប់ខ្លួនបានល្អជាមួយ នឹងការផ្លាស់ប្តូរថ្មីៗនៅលើសកលលោក៕
